ޕްރޮސިކިއުޓަރ ޖެނެރަލް ވ. ޙުމައިދާ

އިޢުތިރާފުގެ މައްޗަށް ޒިނޭގެ ކުށް ސާބިތުކޮށް، ޖިންސީ ކުށުގެ ޤާނޫނުގެ 27 ވަނަ މާއްދާގެ (ހ) އާ ޙަވާލާދީ (ށ) ގެ ދަށުން 100 އެތިފަހަރުން ޙައްދު ޖަހައި 1 އަހަރު ގޭބަންދަށް ޙުކުމްކުރި.

ދަޢުވާ ލިބޭ ފަރާތް ވިހެއި ދަރިއަކީ ޒިނޭކުރުމުން ލިބުނު ދަރިއެއްކަމަށް ބުނެ ތަޙްޤީޤުގައާއި ދަށުކޯޓުގެ ޝަރީޢަތުގެ މަޖިލީހުގައި އިޢުތިރާފުވެ، ވަކީލަކު އައްޔަނުކުރަން ބޭނުން ނުވާކަމަށް ބުނި.

ޕްރޮސިކިއުޓަރ ޖެނެރަލް 3 ނުކުތާއެއް ހުށަހަޅައި އެދުނީ އިޢުތިރާފު ޞައްޙަކަން، ޤާނޫނުއަސާސީގެ ޙައްޤުތައް ލިބިދީފައިވާކަން އަދި ޙައްދު މަނާކުރާ ސަބަބެއް ނެތްކަން ކަށަވަރުކޮށްދިނުމަށެވެ.

ފާދިއްޕޮޅު ނައިފަރު މެޖިސްޓްރޭޓް ކޯޓުގެ 82/G2C/2019 ޤަޟިއްޔާގައި އިޢުތިރާފުގެ މައްޗަށް ޒިނޭގެ ކުށް ސާބިތުކޮށް ޖިންސީ ކުށުގެ ޤާނޫނުގެ 27 ވަނަ މާއްދާގެ ދަށުން ކަނޑައެޅި ޙުކުމަކީ (ސުޕްރީމް ކޯޓުގެ ސަރކިއުލަރގެ ދަށުން ނިހާއީ ކުރުމަށް) ޞައްޙަ ޙުކުމެއްތޯ؛ އިޢުތިރާފު ޞައްޙަތޯ، ޤާނޫނުއަސާސީގެ ޙައްޤުތައް ލިބިދީފައިވޭތޯ، ޙައްދު މަނާކުރާ ސަބަބެއް އޮތްތޯ.

ދަށުކޯޓުގެ ޙުކުމް ޞައްޙަކަމަށް ކަނޑައަޅައި ޤާއިމްކުރި

ހައިކޯޓުން ސުވާލުކުރުމުން އިޢުތިރާފަކީ ޞައްޙަ އިޢުތިރާފެއްކަމާއި ރުޖޫޢުވެފައި ނުވާކަން، ޤާނޫނުއަސާސީގެ 51 ވަނަ މާއްދާގެ ޙައްޤުތައް ލިބިދީފައިވާކަން، އަދި ފުރަތަމަ ފަހަރަށް ރިޢާޔަތްކޮށް އަދަބު ކަނޑައަޅާފައިވާއިރު ތަންފީޛު މަނާކުރާ ސަބަބެއް ނެތްކަން ފާހަގަކޮށް ޙުކުމް ޞައްޙަކަމަށް ކަނޑައެޅި.