ޕްރޮސިކިއުޓަރ ޖެނެރަލް ވ. ހިދާޔަތުﷲ ސަރުބަތުޚާން

ޖިނާއީ ކުށަކާ ގުޅިގެން ހޯދި ފައިސާކަން އެނގޭނެ ހެއްކެއް ޤަރީނާއެއް ހުށަހެޅިފައި ނުވާތީ، ޖިނާއީ އިޖުރާއަތުގެ ޤާނޫނުގެ 37 ވަނަ މާއްދާގެ (ނ) ގެ ދަށުން ފައިސާ 24 ގަޑިއިރު ތެރޭގައި ވެރިފަރާތާ ޙަވާލުކުރުމަށް މޯލްޑިވްސް ޕޮލިސް ސަރވިސްއަށް ކްރިމިނަލް ކޯޓުން އަމުރުކުރިއެވެ.

ބިދޭސީ ރައްޔިތަކު ވެލާނާ އިންޓަރނޭޝަނަލް އެއަރޕޯޓުން ފުލައިޓަކަށް ޗެކިންކުރިއިރު ލަގެޖު ތެރެއިން ފެނުނު އެމެރިކާ ޑޮލަރާއި ޔޫރޯއާއި ޗައިނީސް ޔޫއާން، ރާއްޖެއިން ބޭރަށް ފޮރުވައިގެން ގެންދަން އުޅުނު ފައިސާކަމަށް ބުނެ ހިފެހެއްޓި ނަމަވެސް، އިންވެންޓްރީއެއް ނުދީ ހިފަހައްޓާފައިވާތީ އޭނާ ކްރިމިނަލް ކޯޓަށް ހުށަހެޅިއެވެ.

ޕްރޮސިކިއުޓަރ ޖެނެރަލް ބުނީ އަމުރު ނެރެފައިވަނީ ޖިނާއީ އިޖުރާއަތުގެ ޤާނޫނުގެ 36 އާއި 37 ވަނަ މާއްދާއަށް ފުރިހަމައަށް ރިޢާޔަތްނުކޮށް، ކަސްޓަމްސްގެ ޤާނޫނާއި މަނީ ލޯންޑްރިންގ ހުއްޓުވުމުގެ ޤާނޫނާއި ގަވާއިދުގެ "ޑިކްލެރޭޝަން ޕްރޮސެސް" ގެ މަޤްޞަދަށް ހުރަސްއެޅޭ ގޮތަށް ކަމަށެވެ. ފައިސާ ހިފެހެއްޓިކަން އޭނާއަށް އަންގާފައި ނުވާކަމަށް އިސްތިއުނާފު ރައްދުވި ފަރާތުން ބުނެ، ކަސްޓަމްސްއިން އެކަމަށް އިންކާރުނުކުރެއެވެ.

ފުލައިޓަކުން ބޭރަށް ދަތުރުކުރަން އުޅުނު ބިދޭސީއެއްގެ ލަގެޖުން ފެނިގެން މޯލްޑިވްސް ކަސްޓަމްސް ސަރވިސްއިން ހިފެހެއްޓި ނަގުދު ފައިސާ ވެރިފަރާތާ ޙަވާލުކުރުމަށް ކްރިމިނަލް ކޯޓުން ކުރި އަމުރަކީ ޖިނާއީ އިޖުރާއަތުގެ ޤާނޫނުގެ 36 އާއި 37 ވަނަ މާއްދާއާއި، ކަސްޓަމްސްގެ ޤާނޫނާއި، މަނީ ލޯންޑްރިންގ ހުއްޓުވުމުގެ ޤާނޫނާއި، ނަގުދު ފައިސާ ރިޕޯޓުކުރުމުގެ ގަވާއިދާ ޚިލާފު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

ފައިސާ ހިފެހެއްޓީ ކޯޓު އަމުރަކާ ނުލައި ކަސްޓަމްސްގެ ބާރުގެ ދަށުން ކަމުން ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 36 އާއި 37 ވަނަ މާއްދާ ތަޠުބީޤު ނުވާނެއެވެ. ނަމަވެސް ގަވާއިދުގެ 4 (ނ) ގެ ދަށުން 3 ދުވަހުގެ ތެރޭގައި އަންގަން ޖެހޭ ކަން ކަސްޓަމްސްއިން ނުކުރާތީ ހިފެހެއްޓުން ޤާނޫނާ އެއްގޮތް ނޫނެވެ. ޤާނޫނުއަސާސީގެ 40 (ށ) އާއި 74 (ހ) ގެ ދަށުން ޤާނޫނުގައިވާ ގޮތުގެ މަތިން ނޫނީ މުދާ ހިފެހެއްޓޭނެ ނުވާތީ ދަށުކޯޓުގެ އަމުރަށް ބަދަލުގެންނަން ޖެހޭ ސަބަބެއް ނެތެވެ.