އިސްޙާޤު ޙުސައިން ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ކަނޑައެޅީ ޖިނާއީ އިޖުރާއަތުގެ ޤާނޫނުގެ 36 ވަނަ މާއްދާގެ (ޅ) ގެ ދަށުން ފައިސާ ހިފެހެއްޓުމުގެ ބާރު ޤާނޫނު ތަންފީޛުކުރާ އިދާރާއަށް ލިބިގެންވާތީ، ފައިސާއަކީ ޤާނޫނާ ޚިލާފަށް ހިފަހައްޓާފައިވާ ފައިސާއެއް ނޫންކަމަށާއި ދޫކޮށްލެވޭނެ ފައިސާއެއް ނޫންކަމަށެވެ.

ރަސްމީ ލޯންޗެއްގައި ބޮމެއް ގޮވައިލި ހާދިސާއެއްގެ ތުހުމަތުގައި ކޯޓު އަމުރެއްގެ ދަށުން އިސްތިއުނާފުކުރި ފަރާތުގެ ގެ ބަލައި ފާސްކުރުމުގައި، އޭނާ ދިރިއުޅޭ ކޮޓަރިން ނަޤުދު 900,000 ރުފިޔާ ފުލުހުން ހިފެހެއްޓިއެވެ. އެ މައްސަލައިގައާއި ފައިސާ ލޯންޑަރކުރުމުގެ ތުހުމަތުގައި ދަޢުވާ އުފުލުމުގެ މުއްދަތު ހަމަވިއިރު ދަޢުވާ ނުއުފުލުނެވެ.

އިސްތިއުނާފުކުރި ފަރާތް ބުނީ ނިންމުމަކީ 2017/HC-A/284 ގެ އުޞޫލާއި ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 36 ވަނަ މާއްދާގެ (ހ) އާއި (ޅ) އާ ޚިލާފު ނިންމުމެއްކަމަށާއި، ފައިސާއަކީ ކޮންސްޓްރަކްޝަން އެއްބަސްވުމަކުން ލިބުނު ފައިސާކަމަށެވެ. ދައުލަތުން ބުނީ ފައިސާއަކީ ޚިޔާނަތުގެ ފައިސާ ލޯންޑަރކުރުމުގެ ތެރެއިން ލިބުނު ފައިސާކަމަށް ބެލެވޭ ހެކި ހުރިކަމަށާއި ތަޙްޤީޤު ހިނގަމުންދާކަމަށެވެ.

ކޯޓު އަމުރެއްގެ ދަށުން ގެއެއް ބަލައި ފާސްކުރުމުގައި ފުލުހުން ހިފެހެއްޓި ނަޤުދު ފައިސާ، އެ ތަޙްޤީޤުގައި ދަޢުވާ ނުއުފުލުނު ނަމަވެސް، ކުށްކޮށްގެން ހޯދި ފައިސާއެއްކަމަށް ބެލުމުގެ ހެކި ހުރުމުން ޖިނާއީ އިޖުރާއަތުގެ ޤާނޫނުގެ 36 ވަނަ މާއްދާގެ (ޅ) ގެ ދަށުން ހިފަހައްޓައިގެން ތިބެވޭތޯ.

އިސްތިއުނާފު ބާޠިލު، ދަށުކޯޓުގެ އަމުރު ޤާއިމް

36 (ޅ) ގެ ދަށުން ޙަޤީޤީ ވެރިފަރާތް ހޯދުމަށްވެސް މުދާ ހިފެހެއްޓިދާނެކަމަށާއި، ފައިސާ ހަލާލުކަން ސާބިތުކުރުމުގެ ބުރަ އިސްތިއުނާފުކުރި ފަރާތުގެ މައްޗަށް އޮތުމާއެކު، ހުށަހެޅި އެއްބަސްވުމުގެ ސޮއި ފޯޖުކޮށްފައިވާކަމަށް ބުނެވޭ ހެކި ފަދަ ކަންކަމަށް ބަލާއިރު ފައިސާއަކީ ކުށްކޮށްގެން ހޯދި ފައިސާކަމަށް ބުރަވެވޭތީ، ދަށުކޯޓުގެ ނިންމުމަށް ބަދަލު ގެނައުމަށް ސަބަބެއް ނެތްކަމަށް ކަނޑައެޅުނެވެ.