ޕްރޮސިކިއުޓަރ ޖެނެރަލް ވ. ޙަސަން އިފްހާމް

ކްރިމިނަލް ކޯޓުން ނިންމީ، ފައިސާއާ ގުޅޭ މައްސަލަ ދިގު މުއްދަތެއްގައި ޝަރީޢަތަށް ނުހުށަހަޅާތީއާއި، މިލްކުވެރިކަމަށް ދަޢުވާކުރާ އެހެން ފަރާތެއް ނެތުމުން، މަދަނީ މިންގަނޑުން ފައިސާގެ ޙައްޤުވެރިޔަކީ އެ ފަރާތްކަމަށް ބަލައި 3 ދުވަހުގެ ތެރޭގައި ފައިސާ ޙަވާލުކުރުމަށް ފުލުހުންނަށް އަމުރުކުރުމަށެވެ.

މަސްތުވާތަކެތީގެ މަޢުލޫމާތަކާ ގުޅިގެން އެޕާޓްމަންޓެއް ބަލައިފާސްކުރިއިރު ތުހުމަތުކުރެވޭ ފަރާތުގެ ކޮޓަރިން 620,150 ރުފިޔާ ފުލުހުން ހިފެހެއްޓިއެވެ. ފައިސާއާ ގުޅިގެން ވަކިން ދަޢުވާއެއް ނުކުރި ނަމަވެސް ފައިސާ އަނބުރާ ނުދިނުމުން، އެ ފަރާތުން ފައިސާ ހޯދުމަށް ކްރިމިނަލް ކޯޓަށް މައްސަލަ ހުށަހެޅިއެވެ.

ޕްރޮސިކިއުޓަރ ޖެނެރަލް ބުނީ އަމުރު ނެރެފައިވަނީ މަސްތުވާތަކެއްޗާބެހޭ ޤާނޫނުގެ 157 އަދި 158 ވަނަ މާއްދާއާ ޚިލާފަށް ކަމަށެވެ.

ޖިނާއީ ތަޙުޤީޤަކާ ގުޅިގެން ފުލުހުން ހިފެހެއްޓި ފައިސާ، ތުހުމަތުކުރެވޭ ފަރާތަށް އަނބުރާ ދިނުމަށް ކްރިމިނަލް ކޯޓުން ނެރުނު އަމުރު މަސްތުވާތަކެއްޗާބެހޭ ޤާނޫނުގެ 157 އަދި 158 ވަނަ މާއްދާއާ ޚިލާފުތޯއާއި، އެފަދަ ފައިސާއާ ބެހޭ މައްސަލައެއްގައި ބަލަންޖެހޭ މިންގަނޑަކީ ކޮބައިތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް (އަޣުލަބިއްޔަތުން)

އަޣުލަބިއްޔަތުން ދެކުނީ، ފައިސާ ހިފެހެއްޓުމަކީ 36 (ހ) ގެ ދަށުން ހުއްދަ ކަމެއް ނަމަވެސް، ފައިސާއަކީ ކުންފުންޏަކުން ޑޮލަރު ގަތުމަށް ދިން ފައިސާކަން ލިޔުމުން ދޭހަވާތީ މަދަނީ މިންގަނޑުން ކުށްކޮށްގެން ހޯދި ފައިސާކަން ސާބިތުނުވާކަމަށާއި، ޤާނޫނުއަސާސީގެ 40 (ށ) ގެ ދަށުން ކޯޓު ޙުކުމަކާ ނުލައި މުދާ ނަގައިގެން ނުވާކަމަށެވެ. ޚިލާފު ރައުޔުގައި ބުނީ ގުޅުންހުރި ޖިނާއީ ދަޢުވާ ކޯޓުގައި އޮތުމުން އަމުރު ބާޠިލުކުރަންޖެހޭކަމަށެވެ.