ޙަސަން މަމްދޫޙް ވ. ޕްރޮސިކިއުޓަރ ޖެނެރަލް

ހުޅުމާލެ މެޖިސްޓްރޭޓް ކޯޓުން ޤާނޫނު ނަންބަރު 10/2014 ގެ 51 ވަނަ މާއްދާގެ (ށ) އާއި (ބ) ގެ ދަށުން، އެ މުދަލުގެ ބޭނުން ހިފުން ހުއްޓުވައި ފުލުހުންގެ ބެލުމުގެ ދަށަށް ގެނައުމަށް އަމުރުކުރިއެވެ.

ތުހުމަތުކުރެވޭ ފަރާތް ސޮއި ފޯޖުކޮށް ކުންފުންޏެއްގެ ނަމުގައި ބޭންކް އެކައުންޓް ހުޅުވައި އެޕާޓްމަންޓްތައް މަކަރާއި ހީލަތުން ވިއްކައި ފައިސާ ލޯންޑަރކުރިކަމަށް ތުހުމަތުކުރެވޭ މައްސަލައެއްގައި، އޭނާގެ ފްލެޓެއް ދައުލަތަށް ނެގޭނެ މުދަލެއްކަމަށްބުނެ ހިފެހެއްޓުމަށް ފުލުހުން އެދުނެވެ.

އިސްތިއުނާފުކުރި ފަރާތުން ބުނީ ކުރިން ނެރުނު HMC/ECA/2023/88 އަމުރުން މުޢާމަލާތްކުރުން ހުއްޓުވާފައިވާތީ މި އަމުރަށް ޟަރޫރަތެއް ނެތް ކަމަށާއި، ސުޕްރީމް ކޯޓުގެ 2021/SC-A/30 ގެ އުޞޫލާ ޚިލާފު ކަމަށެވެ. ދައުލަތުން ބުނީ ނުކުތާތަކަކީ އިސްތިއުނާފީ އޮޅިގަނޑު ގިރާކުރާ ނުކުތާތަކެއް ނޫން ކަމަށާއި، އަމުރަށް އެދުނީ ތަޙްޤީޤު ނިމި ދަޢުވާ އުފުލުމަށްފަހު ކަމަށެވެ.

މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ 51 ވަނަ މާއްދާގެ ދަށުން މުދަލެއް ފުލުހުންގެ ބެލުމުގެ ދަށަށް ގެނައުމަށް ހުޅުމާލެ މެޖިސްޓްރޭޓް ކޯޓުން ނެރުނު ހިފެހެއްޓުމުގެ އަމުރު ބާޠިލުކުރަންޖެހޭތޯ؛ އަދި ދަށު ކޯޓަށް ހުށަނާޅާ ކަންކަން އިސްތިއުނާފުގައި ފުރަތަމަ ފަހަރަށް ހުށަހެޅިދާނެތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

މި ބާވަތުގެ އަމުރަށް މުދާ ދައުލަތަށް ނެގިދާނެކަން ސާބިތުކުރަން ނުޖެހޭ ކަމަށާއި، ވަގުތީ ފިޔަވަޅު ނިމުމަށް އެދި ދަށު ކޯޓަށް ހުށަހެޅުމުގެ ފުރުޞަތު އޮތް ނަމަވެސް އެކަން ނުކޮށް ފުރަތަމަ ފަހަރަށް ހައިކޯޓަށް ހުށަހަޅާ ނުކުތާތައް ބަލާނުލެވޭތީ އަމުރު ބާޠިލުކުރާނެ ތަނެއް ނެތެވެ.