ޕްރޮސިކިއުޓަރ ޖެނެރަލް ވ. އީމާން ޢަބްދުލްކަރީމް

ރިޓަށް އެދުނު އިރު ތުހުމަތުކުރެވޭ ފަރާތުގެ މައްޗަށް އެއްވެސް ކޯޓެއްގައި ޖިނާއީ މައްސަލައެއް ނެތުމުން ބަންދަކީ ޖިނާއީ އިޖުރާއަތުގެ ޤާނޫނުގެ 94 ވަނަ މާއްދާގެ (ހ) އާ ޚިލާފު ބަންދެއްކަމަށް ކަނޑައަޅައި ވަގުތުން ދޫކޮށްލުމަށް ކްރިމިނަލް ކޯޓުން އަމުރުކުރިއެވެ.

މަސްތުވާތަކެތި ޓްރެފިކްކުރުމުގެ ތުހުމަތުގައި ބަންދުކޮށް ޝަރީޢަތް ނިމެންދެން ބަންދުކުރުމަށް މެޖިސްޓްރޭޓް ކޯޓުން އަމުރުކުރި ނަމަވެސް، ބަންދުގައިވާ މީހުން ރަށު ކޯޓަށް ޙާޟިރުކުރުމުގެ ދަތިކަމުގެ ސަބަބުން އެ ކޯޓުން 04 ޑިސެމްބަރު 2018 ގައި މައްސަލަ ޕްރޮސިކިއުޓަރ ޖެނެރަލްއަށް އަނބުރާ ފޮނުވިއެވެ. އަލުން ދަޢުވާ ނުކޮށް ބަންދުގައި ބަހައްޓާފައި ހުއްޓާ ތުހުމަތުކުރެވޭ ފަރާތުން 08 ޖަނަވަރީ 2019 ގައި ހޭބިއަސް ކޯޕަސް ރިޓަށް އެދުނެވެ.

ޕްރޮސިކިއުޓަރ ޖެނެރަލް ބުނީ ދަޢުވާ ކުރެވޭ މިންވަރަށް ހެކި ހުރެ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 94 ވަނަ މާއްދާގެ މުއްދަތުގެ ތެރޭގައި ދަޢުވާ ކުރެވިފައިވާތީ ދޫކޮށްލުމަކީ ޖިނާއީ އިޖުރާއަތުގެ ޤާނޫނުގެ 22(ޅ) އާއި 60 ވަނަ މާއްދާއާ ޚިލާފު ނިންމުމެއް ކަމަށެވެ. ރައްދުވާ ފަރާތުން ބުނީ އިސްތިއުނާފު ހުށަހެޅީ މުއްދަތު ފާއިތުވުމަށްފަހު ކަމަށެވެ.

ތުހުމަތުކުރެވޭ ފަރާތްގެ މައްސަލަ މެޖިސްޓްރޭޓް ކޯޓުން ޕްރޮސިކިއުޓަރ ޖެނެރަލްއަށް އަނބުރާ ފޮނުވުމަށްފަހު، އަލުން ދަޢުވާ ނުކޮށް ޝަރީޢަތް ނިމެންދެން ބަންދުގައި ބެހެއްޓުމަކީ ޤާނޫނާ ޚިލާފު ބަންދެއްކަމަށް ކަނޑައަޅައި ހޭބިއަސް ކޯޕަސް ރިޓުން ދޫކޮށްލުމަށް ކްރިމިނަލް ކޯޓުން ނިންމި ނިންމުން ޞައްޙަ ތޯ؛ އަދި އިސްތިއުނާފު ހުށަހެޅީ މުއްދަތުގެ ތެރޭގައި ތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އިސްތިއުނާފު ހުށަހެޅީ މުއްދަތުގެ ތެރޭގައެވެ. މައްސަލަ އަނބުރާ ފޮނުވުމަށްފަހު ދަޢުވާ ނުކޮށް އަދި ބަންދާމެދު ކޯޓަކަށް ނުއެދި ބަހައްޓާފައިވާ ބަންދަކީ ޤާނޫނީ ހަމަތަކާ ޚިލާފު ބަންދެކެވެ. އަލުން ދަޢުވާ ކުރެވިފައިވާތީ ބަންދަށް ބޭނުންނަމަ އެ މައްސަލަ ބަލާ ކޯޓަށް ހުށަހެޅޭނެއެވެ.