އަޙްމަދު ތައުފީޤު ވ. ގަސްހިޔާ މޯލްޑިވްސް ޕވޓ ލޓޑ

ސިވިލް ކޯޓުން، އެއްބަސްވުމުގައި ސޮއިކުރީ އެ ކަންކަން ސާފުވެގެންކަމަށް ބަލައި، ކުންފުނިން އެއްބަސްވުމުގެ ލާޒިމުތައް ފުރިހަމަކޮށްފައިވާތީ، އެއްބަސްވުމަށް އިޙްތިރާމްކޮށް އެއާ އެއްގޮތަށް ޢަމަލުކުރުމަށް އިސްތިއުނާފުކުރާ ފަރާތަށް އަންގައި ޙުކުމްކޮށްފައިވެއެވެ.

އިސްތިއުނާފުކުރާ ފަރާތާއި އިސްތިއުނާފު ރައްދުވާ ކުންފުނީގެ ދެމެދު، އޭނާގެ ބަދަލުގައި ސިވިލް ކޯޓުގެ C/2015-1604/Cv މައްސަލައިގެ ޤާނޫނީ މަސައްކަތް ކުރުމަށާއި، އޭގެ އަގަކަށް އޭނާގެ ގޭގެ ތިރީ ދެބުރި 25 އަހަރަށް ކުއްޔަށް ދިނުމަށް އެއްބަސްވުމެއް ވެފައިވެއެވެ. އެ އެއްބަސްވުމާ އެއްގޮތަށް ޢަމަލުކުރުމަށް އެދި ކުންފުނިން ސިވިލް ކޯޓަށް މައްސަލަ ހުށަހެޅިއެވެ.

އިސްތިއުނާފު ރައްދުވާ ފަރާތުން، މުއްދަތު ހަމަވެ ގާތްގަނޑަކަށް ދިހަ މަސް ފަހުން ހުށަހެޅި މައްސަލައަށް ހުއްދަދީފައިވަނީ ހައިކޯޓުގެ ޤަވާޢިދާއި ސުޕްރީމް ކޯޓުގެ ސާބިޤާތަކާ ޚިލާފަށްކަމަށް އިޖުރާއީ އިޢުތިރާޟު ނެގިއެވެ. އިސްތިއުނާފުކުރާ ފަރާތުން، އަމިއްލަ ބާރު ނުފޯރާ ބަލި ޙާލަތެއްގެ ސަބަބުން ލަސްވީކަމަށާއި ހުއްދަ ދިނުމަކީ ހައިކޯޓުގެ އިޚްތިޔާރުކަމަށް ބުންޏެވެ. މައުޟޫޢީ ގޮތުން، އެއްބަސްވުމުގެ ލާޒިމުތައް ކުންފުނިން ފުރިހަމަ ނުކުރާކަމަށާއި އެއްބަސްވުމަކީ ތަންފީޒު ނުކުރެވޭ އެއްބަސްވުމެއްކަމަށް ބުންޏެވެ.

އިސްތިއުނާފުގެ މުއްދަތު ހަމަވުމަށްފަހު ހުއްދަދީ ބަލައިގަނެފައިވާ މައްސަލައެއްގައި، އިސްތިއުނާފު ރައްދުވާ ފަރާތުން ނަގާ އިޖުރާއީ އިޢުތިރާޟެއްގެ މައްޗަށް، މައުޟޫޢަށް ބެލުމުގެ ކުރިން، މައްސަލަ ބަލައިގަނެވިފައިވަނީ ރަނގަޅަށްތޯ ބަލައި ބެންޗަށް ގޮތެއް ނިންމިދާނެތޯ؛ އަދި އިސްތިއުނާފުކުރާ ފަރާތުގެ ބަލި ޙާލަތަކީ މުއްދަތުގައި އިސްތިއުނާފު ނުކުރެވުނު މަޤްބޫލު ސަބަބެއްތޯ.

އިޖުރާއީ އިޢުތިރާޟު ބަލައިގަނެ، މައްސަލައިގެ މައުޟޫޢާމެދު ހައިކޯޓުން ގޮތެއް ނުކަނޑައަޅާ ނިންމި (ދަށުކޯޓުގެ ޙުކުމް ޤާއިމް)

އަޣުލަބިއްޔަތުގެ ރައުޔުގައި، ހުއްދަ ދީފައިވަނީ ލިޔުންތަކުގެ މައްޗަށް ކަމުން ބެންޗަށް އިޖުރާއީ އިޢުތިރާޟު ބަލައި ގޮތެއް ނިންމިދާނެކަމަށާއި، ބަލި ޙާލަތަކީ ކުރިންވެސް ހުރި، މައްސަލަތައް ކުރިއަށް ގެންދަމުން އައި ޙާލަތެއް ކަމުން، އަދި ޙުކުމް ކުރީ އޭނާގެ ޙާޟިރުގައި ކަމުން، އެއީ މަޤްބޫލު ސަބަބެއް ނޫންކަމަށާއި، ހަމަ އެ ސަބަބާއެކު ހުށަހެޅި އެހެން ދެ މައްސަލައަށް ހުއްދަ ނުދީފައިވާކަމަށް ބަލައި، މައްސަލަ ބަލައިގަނެވިފައިވަނީ ރަނގަޅަށް ނޫންކަމަށް ކަނޑައެޅިއެވެ. ޚިލާފު ރައުޔުގައި ފަނޑިޔާރު މުޙައްމަދު ނިޔާޒް ދެކެވަޑައިގަތީ، ޑޮކްޓަރީ ލިޔުމަކީ މި މައްސަލައަށް އުފެއްދި ލިޔުމެއް ނޫންކަމަށާއި، ޤާނޫނީ ވަކީލާއި މުވައްކިލާ ދެމެދު ވެވޭ ފީގެ އެއްބަސްވުމާއި ފައިޑޫޝިއަރީ ގުޅުމާ ބެހޭ ސީރިއަސް ސުވާލުތައް ހުރުމުން މައުޟޫޢަށް ބަލަންޖެހޭނެ ކަމަށެވެ.