ޕްރޮސިކިއުޓަރ ޖެނެރަލް ވ. ޒައިދު އިސްމާޢީލް

ހޯނޑެއްދޫ މެޖިސްޓްރޭޓް ކޯޓުން ނިންމީ ބަންދުކުރިތާ 30 ދުވަސް ފަހަނައެޅިގެން ދަޢުވާ ހުށަހަޅާފައިވާތީ ދަޢުވާއާ ގެން ކުރިއަށް ނުދެވޭނެ ކަމަށާއި، މިހާރު ކުރެވެން އޮތް ދަޢުވާއެއް ނޫންކަމަށެވެ.

އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު ޖިންސީ ޢަމަލު ހިންގިކަމުގެ ތުހުމަތުގައި ބަންދުކުރެވުނު ފަރާތެއްގެ މައްޗަށް ދަޢުވާ ފޯމާއި ލިޔުންތައް ޕްރޮސިކިއުޓަރ ޖެނެރަލްގެ އޮފީހުން 16 ނޮވެމްބަރ 2017 ގައި ރެޖިސްޓަރޑް ޕޯސްޓަށް ޙަވާލުކުރިއެވެ.

ދައުލަތުން ބުނީ ދަޢުވާ އުފުލުމާއި ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 83 ވަނަ މާއްދާގެ ދަށުން ދަޢުވާ ހުށަހެޅުމަކީ ތަފާތު ދެކަމެއްކަމަށާއި، ދަށުކޯޓުގެ ނިންމުމަކީ ޖިނާއީ އިޖުރާއަތުގެ ޤާނޫނުގެ 83 ވަނަ މާއްދާއާ ޚިލާފު ނިންމުމެއް ކަމަށެވެ.

ބަންދުގައި ހުރި ތުހުމަތުކުރެވޭ ފަރާތެއްގެ މައްޗަށް ޖިނާއީ އިޖުރާއަތުގެ ޤާނޫނުގެ 94 ވަނަ މާއްދާގެ (ހ) ގައިވާ 30 ދުވަހުގެ މުއްދަތުގެ ތެރޭގައި ދަޢުވާ އުފުލިކަމަށް ބަލަންވީ ދަޢުވާ ފޯމު ރެޖިސްޓްރީ ޕޯސްޓަށް ޙަވާލުކުރި ތާރީޚުންތޯ، ނުވަތަ ކޯޓަށް ލިބުނު ތާރީޚުންތޯ؛ އަދި ދަށުކޯޓުން ދަޢުވާ ބަލައިނުގަތުމަކީ ޤާނޫނާ އެއްގޮތަށް ކުރި ނިންމުމެއްތޯ.

ދަށުކޯޓުގެ ޙުކުމް ބާޠިލު؛ ދަޢުވާ އަލުން ހުށަހަޅައިފިނަމަ ބަލައިގަނެ ގޮތެއް ކަނޑައަޅަންޖެހޭ

ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 83 ވަނަ މާއްދާއާ ބެހޭ ދައުލަތުގެ މާނަކުރުން ބަލައިނުގަނެ، ނަމަވެސް ރެޖިސްޓްރީ ޕޯސްޓުން ފޮނުވާ ތަކެއްޗަށް ބަލަންވީ ފޮނުވި ތާރީޚަށް ކަމަށާއި، 16 ނޮވެމްބަރ 2017 އަކީ 19 ނޮވެމްބަރ 2017 ގެ ކުރީގެ ތާރީޚަކަށްވާތީ ދަޢުވާ އުފުލާފައިވަނީ މުއްދަތުގެ ތެރޭގައިކަމަށް ކަނޑައެޅިއެވެ.