ޕްރޮސިކިއުޓަރ ޖެނެރަލް ވ. ޙަސަން ޒިޔާން އިބްރާހީމް

ބަންދު އަމުރު މުރާޖަޢާކުރުމަށް ތުހުމަތުކުރެވޭ ފަރާތްތަކުން އެދުމުން، ކްރިމިނަލް ކޯޓުން ހެކިވެރިން ސިއްރު ހެކިންނަށް ވާތީ ނުފޫޒު ފޯރުވުމުގެ އިޙްތިމާލު ކުޑަވެފައިވާކަމާއި ޝަރުޠުތަކުން ނުރައްކާ ކުޑަކުރެވޭނެކަމަށް ބަޔާންކޮށް ހަތަރު ފަރާތް ޝަރުޠުތަކާއެކު ބަންދުން ދޫކުރިއެވެ.

މަގުމަތީގައި ބަޔަކަށް ވަޅިއާއި ލަޓިބުރި ފަދަ ހަތިޔާރުން ހަމަލާދިން ހާދިސާއަކާ ގުޅިގެން ތުހުމަތުކުރެވޭ ފަރާތްތަކުގެ މައްޗަށް ޤާނޫނު ނަންބަރު 17/2010 ގެ 8 ވަނަ މާއްދާގެ ދަށުން ދަޢުވާކޮށް، ޝަރީޢަތް ނިމެންދެން ބަންދުކުރުމަށް އަމުރުކޮށްފައިވިއެވެ.

ދައުލަތުން ބުނީ އަމުރުތައް ޤާނޫނު ނަންބަރު 17/2010 ގެ 12 އަދި 16 ވަނަ މާއްދާއާއި މަތީ ކޯޓުތަކުގެ ނިންމުންތަކާ ޚިލާފު ކަމަށާއި ޙާލަތު ބަދަލުވި ސަބަބެއް ނުފެންނަ ކަމަށެވެ. ތުހުމަތުކުރެވޭ ފަރާތްތަކުން ބުނީ އިސްތިއުނާފު ލަސްވެ ހުށަހެޅިކަމަށާއި، ޙާލަތު ބަދަލުވި ކަމަށާއި، ދަޢުވާގެ ބޮޑުކަމަކީ ބަންދުކުރުމުގެ ސަބަބެއް ނޫންކަމަށާއި ފަނޑިޔާރުގެ އިޚްތިޔާރަށް ނުވަދެވޭނެ ކަމަށެވެ.

ތޫނު އެއްޗެއް ނުވަތަ ހަތިޔާރު ބޭނުންކޮށްގެން މާރާމާރީ ހިންގުމުގެ ދަޢުވާގައި ޤާނޫނު ނަންބަރު 17/2010 ގެ 16 ވަނަ މާއްދާގެ ދަށުން ޝަރީޢަތް ނިމެންދެން ބަންދުކުރެވިފައިވާ ފަރާތްތައް، ޙާލަތު ބަދަލުވިގޮތް ބަޔާންނުކޮށް ޝަރުޠުތަކާއެކު ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރުތަކަކީ އެ ޤާނޫނުގެ 16 ވަނަ މާއްދާއާއި ޤާނޫނުއަސާސީގެ 143 ވަނަ މާއްދާގެ (ރ) އާ ޚިލާފު އަމުރުތަކެއްތޯ؛ އަދި ދައުލަތުގެ އިސްތިއުނާފު ހުށަހެޅީ 48 ގަޑިއިރުގެ މުއްދަތުގެ ތެރޭގައިތޯ.

ބަންދުން ދޫކުރުމަށް ދަށުކޯޓުން ނެރުނު އަމުރުތައް ބާޠިލު

އިސްތިއުނާފު ހުށަހެޅީ މުއްދަތުގެ ތެރޭގައެވެ. ހެކިންނަށް ނުފޫޒު ފޯރުވުމާ ބެހޭ ފަނޑިޔާރުގެ ނިންމުމަށް ނުވަދެވޭ ނަމަވެސް، މުޖުތަމަޢުގެ ސަލާމަތަށް އޮތް ނުރައްކާ ކުޑަވި ގޮތެއް ބަޔާންނުކޮށް ހަމައެކަނި ޝަރުޠުތަކަށް ބަރޯސާވެ ދޫކޮށްލުމަކީ ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 16 ވަނަ މާއްދާގެ (ހ) އާ ޚިލާފު ކަމެއް ކަމަށް ކަނޑައެޅިއެވެ.