މުޙައްމަދު ޝަހީދު ވ. ޚަދީޖާ މުޙައްމަދު

ފުވައްމުލަކު މެޖިސްޓްރޭޓް ކޯޓުން ނިންމީ 596/R1C-3/2011 ގައި ހިބައަކީ ސައްޙަ ހިބައެއްކަމަށް ކަނޑައަޅާފައިނުވާތީ، އެކަން ކޯޓަކުން ކަނޑައަޅަންޖެހޭކަމަށާއި، ގޯތި ބައިކޮށް ވަކިކޮށްދެވެން ނެތްކަމަށެވެ.

ފުވައްމުލަކު މެޖިސްޓްރޭޓް ކޯޓުގެ 596/R1C-3/2011 ޤަޟިއްޔާއިން، ގެއާއި ގޯތީގެ ބައެއް އިސްތިއުނާފުކުރި ފަރާތަށް ހިބަކޮށްދީފައިވާކަން ސާބިތުކޮށްފައިވެއެވެ. އެ ހިބައިން ރުޖޫޢަވުމަށް ކުރި ދަޢުވާ (609/R1C-3/2012) ބާޠިލުކޮށް، ހައިކޯޓުގެ 2013/HC-A/155 ގައި އެ ޙުކުމް ޤާއިމުކުރިއެވެ. ދެން އެ ހިބައިގެ މައްޗަށް ގޯތި ބައިކުރަން އެދި ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ސާބިތުވި ހިބައިގެ ޙުކުމް އިސްތިޤްރާރުވެފައިވަނިކޮށް އެއާ ޚިލާފަށް ނިންމާފައިވާކަމަށާއި، މައްސަލައާ ގުޅުމެއްނެތް ސުވާލު އުފައްދާފައިވާކަމަށާއި، އެއް މަރުޙަލާގެ ކޯޓެއްގެ ނިންމުމަކާމެދު ސުވާލު އުފެއްދުމުގެ ބާރު އެ ދަރަޖައިގެ އެހެން ކޯޓަކަށް ނުލިބޭކަމަށެވެ.

އިސްތިއުނާފުނުކުރެވި ނިހާއީވެފައިވާ ޙުކުމަކުން ސާބިތުކުރި ހިބައެއްގެ ސައްޙަކަން އަލުން ކޯޓަކުން ކަނޑައަޅަންޖެހޭކަމަށް ބުނެ، އެ ހިބައިގެ މައްޗަށް ގޯތި ބައިކުރަން ހުށަހެޅި ދަޢުވާ ބާޠިލުކުރުން ޞައްޙަތޯ.

ދަށުކޯޓުގެ ޙުކުމް ބާޠިލު؛ ގޯތީގެ ބިން ބައިކޮށް އިސްތިއުނާފުކުރި ފަރާތުގެ ބައި ވަކިކޮށްދޭންޖެހޭކަމަށް ކަނޑައަޅައި އަލުން ބެލުމަށް ފޮނުވި

ހިބަ ސާބިތުކުރި ޙުކުމަކީ އިސްތިއުނާފުނުކުރެވި ނިހާއީވެފައިވާ ޙުކުމެއްކަމަށާއި، އޭގެ މައްޗަށް ހައިކޯޓުންވެސް ރުޖޫޢަވުމުގެ ދަޢުވާ ބާޠިލުކޮށްފައިވާތީ، ހިބައިގެ ސައްޙަކަން އަލުން ކަނޑައަޅަންޖެހޭކަމަށް ނިންމުމަކީ 2011/SC-SJ/03 ގެ އުޞޫލާ ޚިލާފު ކަމެކެވެ.