2017/HC-A/231

ހެކި ނައްތާލައިފާނެކަމަށް ނުވަތަ ހެކިބަސްދޭން ހުރި މީހަކަށް ނުފޫޒު ފޯރުވައިފާނެކަމަށްޓަކައި 15 ދުވަހަށް ގޭގައި ބަންދުކުރުމަށް ކްރިމިނަލް ކޯޓުން އަމުރުކުރެއްވިއެވެ.

ހައިކޯޓުގެ ފަނޑިޔާރަކަށް ނުރައްކާވާފަދަ ޙަމަލާއެއް ދިނުމަށް ރޭވިކަމުގެ ތުހުމަތުގައި ބަންދުކުރުމަށް ކުރިން ނެރުއްވި ކްރިމިނަލް ކޯޓުގެ އަމުރެއްގެ އިތުރު ބަޔާނުގައި، މުއްދަތުގައި ތަޙްޤީޤު ފުރިހަމަކޮށް ދަޢުވާކުރުމާމެދު ގޮތެއް ނުނިންމައިފިނަމަ ދޫކޮށްލެވޭނެކަމަށް އަންގާފައިވިއެވެ. ދަޢުވާކުރުމާމެދު ގޮތެއް ނުނިންމައި ފުލުހުން އަލުން އަމުރަކަށް އެދުނެވެ.

އިސްތިއުނާފުކުރި ފަރާތުން ބުނީ، ކުރީގެ އަމުރުގެ އިތުރު ބަޔާނަށް ހުރަސްއަޅައި ނެރުއްވި މި އަމުރަކީ 2011/SC-SJ/03 ގައިވާ އުޞޫލާ ޚިލާފު އަމުރެއް ކަމަށެވެ. ދައުލަތުން ބުނީ ދެފަހަރު މަޝްވަރާކުރި ނަމަވެސް ދަޢުވާކުރުމާމެދު ގޮތެއް ނުނިންމާ ކަމަށެވެ.

ކުރީގެ ބަންދު އަމުރެއްގެ އިތުރު ބަޔާނުގައި، މުއްދަތުގައި ދަޢުވާކުރުމާމެދު ގޮތެއް ނުނިންމައިފިނަމަ ދޫކޮށްލެވޭނެކަމަށް އަންގާފައިވަނިކޮށް، އެ އަމުރަށް އިސްތިއުނާފު ނުވަތަ މުރާޖަޢާ ނުކޮށް، ތުހުމަތުކުރެވޭ ފަރާތް ގޭގައި ބަންދުކުރުމަށް ކްރިމިނަލް ކޯޓުން ނެރުއްވި އަމުރު ޝަރުޢީ އަދި ޤާނޫނީ ހަމަތަކާ އެއްގޮތްތޯ.

ދަށުކޯޓުގެ އަމުރު ބާޠިލު، ޝަރުޠުތަކާއެކު ބަންދުން ދޫކޮށްލި

ކުރީގެ އަމުރަށް ދައުލަތުން އިސްތިއުނާފު ނުވަތަ މުރާޖަޢާ ނުކޮށް، އެ އަމުރަށް ހުރަސްއެޅޭ ގޮތަށް އެއްމަރުޙަލާގެ ކޯޓަކުން ގޮތެއް ނިންމުމަކީ ޝަރުޢީ ނިޒާމުގެ އަސާސީ އުޞޫލުތަކާއި ޢަދުލު އިންޞާފާ ތަޢާރުޟުވާ ކަމެކެވެ. ތަޙްޤީޤުގެ މިންވަރަށް ރިޢާޔަތްކޮށް، ތުހުމަތުކުރެވޭ ފަރާތް އެއްބަސްވި ޝަރުޠުތަކާއެކު ދޫކޮށްލުމަށް ނިންމިއެވެ.