މުޙައްމަދު ރަޝީދު ވ. މޯލްޑިވްސް ޕޯޓްސް ލިމިޓެޑް

ވަޒީފާއާބެހޭ ޓްރައިބިއުނަލުން ނިންމީ ވަކިކުރީ ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 23 ވަނަ މާއްދާ ހުއްދަކުރާ އެކަށީގެންވާ ސަބަބަކާހުރެ، މައުޟޫޢީ އަދި އިޖުރާއީ ޢަދުލުވެރިކަން ޤާއިމުކުރުމަށްފަހު ކަމަށާއި އެދުނު އަމުރެއް ނުކުރެވޭނެކަމަށެވެ.

މޯލްޑިވްސް ޕޯޓްސް ލިމިޓެޑުގެ ވިންޗްމަނަކާއި އެހެން މުވައްޒަފަކާ ދެމެދު 2018 ފެބުރުވަރީ 08 ގައި ބޯޓެއްގައި ޒުވާބުވެ މާރާމާރީއެއް ހިނގުމުން، ސަސްޕެންޑްކޮށް ޑިސިޕްލިނަރީ ކޮމިޓީން ތަޙްޤީޤުކުރުމަށްފަހު 25 ފެބުރުވަރީ 2018 ގައި ވަކިކުރިއެވެ.

މުވައްޒަފު ބުނީ މާރާމާރީ ހިންގީ އަނެކަކު ކަމަށާއި ނޯޓިސް ނުދީ ވަކިކުރުމަކީ ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 23 ވަނަ މާއްދާއާއި 21 ވަނަ މާއްދާއާ ޚިލާފު ކަމެއްކަމަށެވެ. ކުންފުނިން ބުނީ ތަޙްޤީޤަށްފަހު ފާޅުކަންބޮޑު ޣައިރު ސުލޫކީ ޢަމަލަކަށް ވަކިކުރީ އެއްބަސްވުމާއި ޕޮލިސީއާ އެއްގޮތަށްކަމަށެވެ.

މަސައްކަތުގެ މާޙައުލުގައި ހިނގި މާރާމާރީއެއްގައި ބައިވެރިވި މުވައްޒަފަކު ތަޙްޤީޤަކަށްފަހު ނޯޓިސް ނުދީ ވަކިކުރުމަކީ ވަޒީފާއާބެހޭ ޤާނޫނުގެ 21 އަދި 23 ވަނަ މާއްދާއާ ޚިލާފު ކަމެއްތޯ.

އިސްތިއުނާފު ބާޠިލް، ޓްރައިބިއުނަލްގެ ނިންމުން ޤާއިމް

އިސްތިއުނާފީ ނުކުތާތަކުގައި ޤާނޫނީ ބަޙުޘު ސާފުކޮށް ބަޔާންކޮށްފައި ނުވެއެވެ. ތަޙްޤީޤުގެ ބަޔާންތަކުން މުވައްޒަފު މާރާމާރީގައި ބައިވެރިވިކަން ސާބިތުވެއެވެ؛ މަސައްކަތުގެ މާޙައުލުގައި މާރާމާރީ ހިންގުމަކީ ނޯޓިސް ނުދީ ވަކިކުރެވޭނެ ފާޅުކަންބޮޑު ޣައިރު ސުލޫކީ ޢަމަލެކެވެ.