ކްރައުން ކޮމްޕެނީ ޕވޓ ލޓޑ ވ. އަޙްމަދު ޙުސައިން

ވަޒީފާއާބެހޭ ޓްރައިބިއުނަލުން ވަކިކުރުމުގެ އެކަށީގެންވާ ހަމަ ސާބިތުކުރަން ހެކި ނެތުމާއި ސަސްޕެންޝަނަށްފަހު ބަޔާން ނުނަގާ ތަޙުޤީޤު ނުކުރުމުން މައުޟޫޢީ އަދި އިޖުރާއީ ޢަދުލުވެރިކަން ޤާއިމްނުވާ ކަމަށް ކަނޑައަޅައި ވަޒީފާއަށް ރުޖޫޢަކޮށް މުސާރަ ދިނުމަށް އަމުރުކުރިއެވެ.

ރިސޯޓެއްގެ ހައުސްކީޕިންގ ސުޕަވައިޒަރަކު މެޑިކަލަށް ފުރަން ދިޔައިރު ދަބަހުން ރިސޯޓުގެ ލިނެން އާއި ބާލީސް އުރަ ފެނުމުން ސަސްޕެންޑްކޮށް، ޖެހިގެން އައި ދުވަހު ނޯޓިސް ނުދީ ވަޒީފާއިން ވަކިކުރިއެވެ.

ކުންފުނިން ބުނީ މުވައްޒަފު ޢަމަލަށް އިޢުތިރާފުވެ ލިޔުމުން ބަޔާން ދީ މަޢާފަށް އެދުނު ކަމަށާއި ޖަވާބުދާރީވުމުގެ ފުރުޞަތު ދެވުނު ކަމަށެވެ. މުވައްޒަފު ބުނީ ބަޔާން ދިނީ ބިރުދައްކައި މަޖުބޫރުކޮށްގެން ކަމަށާއި ތަޙުޤީޤެއް ނުކުރާ ކަމަށެވެ.

ރިސޯޓުގެ ތަކެތި ދަބަހުން ފެނުނު މުވައްޒަފަކު ނޯޓިސް ނުދީ ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމްނުވާ ކަމަށް ވަޒީފާއާބެހޭ ޓްރައިބިއުނަލުން ނިންމީ ރަނގަޅަށްތޯ.

ޓްރައިބިއުނަލްގެ ނިންމުން ބާޠިލު (އިސްތިއުނާފު ޤަބޫލު)

ހުށަހެޅުނު ބަޔާންތަކާއި ސެކިއުރިޓީ ލޮގު މަދަނީ މިންގަނޑުން ވަޒަންކުރާއިރު ޚިޔާނާތުގެ ޢަމަލަކީ ނޯޓިސް ނުދީ ވަކިކުރުމަށް އެކަށީގެންވާ ސަބަބެކެވެ. ހާދިސާގެ ވަގުތާއި އެޗް.އާރުގައި ވާހަކަދައްކާ ފުރުޞަތު ލިބުނީތީ އިޖުރާއީ ޢަދުލުވެރިކަން ޤާއިމްވެއެވެ.