މުޙައްމަދު ނާޞިރު އަޙްމަދު ވ. އާމިނަތު ޝެރިން

ސިވިލް ކޯޓުން ކާރު ވިއްކި އަގު 125,000 ރުފިޔާ 8 މަހުގެ ތެރޭގައި ދެއްކުމަށް ފިރިމީހާއަށް ޙުކުމްކުރިއެވެ.

ދެމަފިރިންކަމުގައި ހުއްޓާ އަނބިމީހާގެ މިލްކުގައިވާ ކާރު، އޭނާގެ ރުހުމާއެކު ފިރިމީހާ ބޭނުންވި ސައިކަލެއްގެ އަގުގެ ބައެއްގެ ގޮތުގައި 125,000 ރުފިޔާއަށް ވިއްކިއެވެ. ވަކިވުމަށްފަހު އަނބިމީހާ ކާރުގެ 250,000 ރުފިޔާ ހޯދަން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ދަޢުވާކުރީ އޮޕަޗިއުނިޓީ ކޮސްޓަށް ކަމަށާއި ދަޢުވާއާ ތަފާތު ގޮތަކަށް ޙުކުމްކުރި ކަމަށް (2010/HC-A/47)، އަދި ހެކިތަކަށް ފުރިހަމައަށް ރިޢާޔަތްނުކޮށް 2013/SC-A/27 ގެ އުޞޫލާ ޚިލާފަށް ތަބައްރުޢެއް ނޫން ކަމަށް ބެލި ކަމަށެވެ.

ދަޢުވާގައި އެދުނު ޢަދަދާ ތަފާތު ޢަދަދަކަށް ދަށުކޯޓުން ޙުކުމްކުރުމަކީ ދަޢުވާގެ ސީޣާއާ ޚިލާފު ނިންމުމެއްތޯ؛ އަދި އަނބިމީހާގެ މިލްކުގައިވާ ކާރު އޭނާގެ ރުހުމާއެކު ވިއްކައިގެން ލިބުނު ފައިސާ ފިރިމީހާ ބޭނުންކުރުމުން، އެ ފައިސާ އަނބުރާ ދޭންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކާރުގެ މިލްކުވެރިޔާއަކީ އަނބިމީހާ ކަމުން ވިއްކައިގެން ލިބުނު މަންފާއަކީ އޭނާގެ ޙައްޤެކެވެ. ތަބައްރުޢެއް ސާބިތުނުވާތީ ފައިސާ އަނބުރާ ދޭންޖެހެއެވެ. ދަށުކޯޓުން ސަބަބު ބަޔާންކޮށް ނިންމާފައިވާތީ 2010/HC-A/47 ގެ އުޞޫލާ ޚިލާފެއް ނުވެއެވެ.