އިބްރާހީމް ރަޝީދު ޙުސައިން ވ. ޢަބްދުއްޞަމަދު އަޙްމަދު

ސިވިލް ކޯޓުން، 15 އަހަރު ދުވަހަށް ތަނުގެ މަދަނީ އަދި މާލީ މަންފާ ލިބިގަތުމުގެ ޙައްޤުވެރިޔަކީ ދަޢުވާކުރި ފަރާތްކަމަށް ކަނޑައަޅައި، ތަނުގައި ދިރިއުޅޭ މީހުން ދައްކާ ކުލި އެފަރާތާ ޙަވާލުކުރުމަށް، ދަޢުވާލިބޭ ފަރާތުގެ ޣައިރު ޙާޟިރުގައި ޙުކުމްކުރި.

ގެއެއްގެ ފްލެޓެއްގެ ގްރައުންޑް ފްލޯ ކުއްޔަށް ދިނުމަށް 29 ޖޫން 2016 ގައި ވެފައިވާ އެއްބަސްވުމާ ޚިލާފަށް ތަނުގެ ވެރިފަރާތުން ތަން ޙަވާލުނުކުރުމުން، ތަން ހޯދުމަށާއި ގެއްލުމުގެ ބަދަލު ހޯދުމަށް ކުއްޔަށް ހިފި ފަރާތުން ދަޢުވާކުރި.

އިސްތިއުނާފުކުރި ފަރާތުން ބުނީ ޙުކުމަކީ ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) (1) އާ ޚިލާފު ޙުކުމެއް ކަމަށާއި، ޣައިރު ޙާޟިރުގައި ޙުކުމްކުރުމަކީ ޤާނޫނުއަސާސީގެ 42 ވަނަ މާއްދާގެ (ށ) އާއި ޝަރުޢީ އުޞޫލުތަކާ ޚިލާފު ކަމެއް ކަމަށް.

ދަޢުވާގެ ސީޣާއިން ބޭރުން ސިވިލް ކޯޓުން ޙުކުމްކުރުމަކީ ޞައްޙަ ކަމެއްތޯއާއި، ކޯޓަށް މީހުން ޙާޟިރުކުރުމުގެ ޤަވާޢިދުގެ 28 ވަނަ މާއްދާގެ (ހ) ގެ އިޖުރާއާތު ފުރިހަމަނުކޮށް ދަޢުވާލިބޭ ފަރާތުގެ ޣައިރު ޙާޟިރުގައި މައްސަލަ ހިންގުމަކީ ޞައްޙަ ކަމެއްތޯ.

ދަށުކޯޓުގެ ޙުކުމް ބާޠިލުކޮށް، އަލުން ބެލުމަށް ސިވިލް ކޯޓަށް ފޮނުވި

ޙުކުމް ކުރެވިފައިވަނީ ދަޢުވާގެ ސީޣާއިން ބޭރުން ކަމަށާއި، އެއްބަސްވުމުގައި ކުލީގެ މަންފާ ކުއްޔަށް ހިފާ ފަރާތަށް ލިބޭނެ މާއްދާއެއް ނެތްކަމަށާއި، ޣައިރު ޙާޟިރުގައި މައްސަލަ ހިންގާފައިވަނީ ޤަވާޢިދުގެ 28 (ހ) ގެ އިޖުރާއާތު ފުރިހަމަނުކޮށް ކަމަށް ހައިކޯޓުން ފާހަގަކުރި.