ޢަބްދުލްޣަނީ މުޙައްމަދު ވ. އާދަމް ޢީސާ

ސިވިލް ކޯޓުން، ކުލި ދައްކަމުން ގޮސްފައިނުވާތީ އެއްބަސްވުން ބާޠިލުވެއްޖެކަމަށް ކަނޑައަޅައި، 30 ދުވަހުގެ ތެރޭގައި ފްލެޓުން މީހުންނާއި މުދާ ނެރެ ތަން ޙަވާލުކުރުމަށް ދަޢުވާކުރި ފަރާތަށް އެންގިއެވެ.

ބަންޑާރަ ގޯތީގައިވާ 4 ކޮޓަރީގެ ފްލެޓެއް ކުއްޔަށް ހިފި ފަރާތުން ދައްކާ ކުލި، ވެރިފަރާތް ނިޔާވުމަށްފަހު ވާރިޘުން ބަލައިނުގަންނާނެކަމަށް އެންގުމުން، 10 މަސްދުވަހުގެ ކުލި ޝަރީޢަތުގެ ފަރާތުން ވާރިޘުންނާ ޙަވާލުކޮށްދިނުމަށް އެދި ކުއްޔަށް ހިފި ފަރާތުން ދަޢުވާކުރިއެވެ. ތަރިކަ ބެހުމުގެ މައްސަލައިގައި ކުލި އެއްބަސްވުންތަކަށް ޙުރުމަތްތެރިވުމަށް ވާރިޘުންނަށް އަންގާފައިވިއެވެ.

އިސްތިއުނާފުކުރި ފަރާތުން ބުނީ، ދަޢުވާއަކީ ކުލި ޙަވާލުކުރުމުގެ ދަޢުވާއެއްކަމަށްވާއިރު ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފަށް އެއްބަސްވުން ބާޠިލުކުރި ކަމަށާއި، ދަޢުވާލިބޭ ބައެއް ފަރާތްތަކުގެ ބަސް ނުހޯދައި ޤާނޫނުއަސާސީގެ 42 (ށ) އާ ޚިލާފަށް ޙުކުމްކުރި ކަމަށެވެ.

ކުލި ބަލައިނުގަތުމުން ކުލި ޝަރީޢަތުގެ ފަރާތުން ޙަވާލުކޮށްދިނުމަށް ކުއްޔަށް ހިފި ފަރާތުން ހުށަހެޅި ދަޢުވާއެއްގައި، ކުލި އެއްބަސްވުން ބާޠިލުވެއްޖެކަމަށް ކަނޑައަޅައި ތަނުން ނުކުތުމަށް ޙުކުމްކުރުމަކީ ދަޢުވާގެ ސީޣާއިން ބޭރުން ކުރެވުނު ޙުކުމެއްތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ފޮނުވި

ދަޢުވާގައި އެދިފައިވަނީ ކުލި ޙަވާލުކުރުމަށް ކަމަށްވާއިރު، އެއްބަސްވުން ބާޠިލުކޮށް ތަނުން ނެރުމަށް ކުރި ޙުކުމަކީ ދަޢުވާގެ ސީޣާއިން ބޭރުން ކުރެވުނު ޙުކުމެއް ކަމަށްވާތީއާއި، ތަރިކަ ބެހުމުގެ ޙުކުމާއި ވާރިޘުންގެ ބަޔާން ވެސް ނުބެލުނުތީ، ދަޢުވާގެ މައުޟޫޢު ޝަރުޢީ އަދި ޤާނޫނީ ހަމަތަކުގެ މަތިން ބަލާފައިނުވާތީ ޙުކުމް ބާޠިލުކުރެވުނެވެ.