މުޙައްމަދު އިސްމާޢީލް ވ. ސިވިލް ސަރވިސް ކޮމިޝަން

ސަސްޕެންޝަނަކީ ޤާނޫނާ އެއްގޮތް ކަމެއް ކަމަށާއި، ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމުކުރިކަން ސާބިތުނުވާތީ ވަކިކުރީ ޤާނޫނާ ޚިލާފަށްކަމަށް ނިންމި ނަމަވެސް، އިތުބާރު ގެއްލިފައިވާތީ ވަޒީފާއަށް ރުޖޫޢު ނުކޮށް 179,780.67 ރުފިޔާ ބަދަލު ދިނުމަށް ޓްރައިބިއުނަލުން ނިންމިއެވެ.

އިސްކަންދަރު ސްކޫލުގެ ޓީޗަރަކު، ކުޑަކުއްޖަކާ ގުޅޭ ޖިންސީ ތުހުމަތެއްގެ ފުލުހުންގެ މައްސަލައެއްގައި ޖިނާއީ ދަޢުވާއެއް ނުއުފުލުނު ނަމަވެސް، ފުލުހުންގެ ތަޙްޤީޤުން ލިބުނު މަޢުލޫމާތަށް ބިނާކޮށް ސިވިލް ސަރވިސް ކޮމިޝަނުން ސަސްޕެންޑްކޮށް ވަޒީފާއިން ވަކިކުރިއެވެ.

އިސްތިއުނާފުކުރި ފަރާތުން ބުނީ ޤާނޫނުގައި ވަޒީފާގައި އަލުން ބެހެއްޓުމަށް އިސްކަންދޭން ޖެހޭކަމަށާއި، ޤާނޫނުގައި ނެތް 'އިތުބާރު ގެއްލުމުގެ' ސަބަބު ބުނެ ވަޒީފާ ނުދިނުމަކީ ޤާނޫނީ އުޞޫލެއް ނޫންކަމަށާއި، އިތުބާރު ގެއްލުވީ ދައުލަތުން ކަމަށެވެ.

އެކަށީގެންވާ ސަބަބެއް ނެތި ވަކިކުރި ޓީޗަރަކު ވަޒީފާއަށް އަނބުރާ ރުޖޫޢު ނުކޮށް، ދެފަރާތުގެ މެދުގައި އިތުބާރު ގެއްލިފައިވާތީ ބަދަލު ދިނުމަށް ވަޒީފާއާބެހޭ ޓްރައިބިއުނަލުން ނިންމުމަކީ ޤާނޫނާ އެއްގޮތް ނިންމުމެއްތޯ.

އިސްތިއުނާފު ބާޠިލް، ވަޒީފާއާބެހޭ ޓްރައިބިއުނަލްގެ ނިންމުން ޤާއިމް

އަނބުރާ ރުޖޫޢުކުރުމަކީ ފުރަތަމަ ބަލަންޖެހޭ ފަރުވާ ނަމަވެސް، އިތުބާރު ގެއްލުމަކީ އެކަށީގެންވާ ސަބަބެއްކަމަށާއި، ޓީޗަރެއްގެ މަޤާމާއި ތުހުމަތުގެ ބާވަތަށް ބަލާއިރު ކުޑަކުދިންގެ މަޞްލަޙަތަށް އިސްކަންދީ އަނބުރާ ރުޖޫޢު ނުކުރުމަކީ ރަނގަޅު ނިންމުމެއްކަމަށް ކޯޓުން ނިންމިއެވެ.