މުޙައްމަދު އަސްލަމް ވ. އެޓަރނީ ޖެނެރަލްގެ އޮފީސް

ސިވިލް ކޯޓުން 1956 ވަނަ އަހަރަކީ ޞައްޙަ އަހަރު ނޫންކަން ހުށަހެޅި ލިޔުންތަކުން ސާބިތުނުވާތީ އުފަން އަހަރު ބަދަލުކުރާނެ ތަނެއް ނެތްކަމަށް ޙުކުމްކުރި.

އައިޑީ ކާޑުގައި 1956 ކަމަށް ލިޔެފައިވާ އުފަން ތާރީޚަކީ ޞައްޙަ ތާރީޚެއް ނޫންކަމަށާއި ޞައްޙަ ތާރީޚަކީ 1943 ކަމުގައި ކަނޑައަޅައިދިނުމަށް އެދި ދަޢުވާކުރި. އައިޑީ ކާޑު ހެއްދުމަށް އޭނާ ހުށަހެޅި ފޯމާއި މާލޭ ރަށްވެހިންގެ ރަޖިސްޓްރީތަކުގައިވެސް އުފަން އަހަރަކީ 1956.

އިސްތިއުނާފުކުރި ފަރާތުން ބުނީ ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) ގެ 1 ވަނަ ނަންބަރުގައިވާ ކަންކަމަށް ފުރިހަމައަށް ރިޢާޔަތްނުކުރާކަމަށް. ޙުކުމް އިއްވުމަށް ބޭއްވި މަޖިލީހުގައި ބުނީ އައިޑީ ކާޑުގައިވާ އަހަރުން ކޮއްކޮ އޭނާއަށްވުރެ ދޮށިވާކަމަށް.

އައިޑީ ކާޑުގައިވާ އުފަން އަހަރަކީ ޞައްޙަ އަހަރު ނޫންކަން ސާބިތުނުވާތީ ބަދަލުކޮށްނުދިން ސިވިލް ކޯޓުގެ ޙުކުމަކީ ޢުމުރު ބަދަލުކުރުމުގެ މައްސަލަތަކުގައި ޢަމަލުކުރަންޖެހޭ އުޞޫލުތަކާއި (ސުޕްރީމް ކޯޓުގެ 2016/03 ޢާއްމު ސިޓީ) ހެކީގެ ޤާނޫނާ ޚިލާފު ޙުކުމެއްތޯ؛ އަދި ހައިކޯޓުގައި ފަހުން ފާހަގަކުރި އައު ކަމެއް ބެލޭނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (އައު ހެކިތަކާއެކު ދަށުކޯޓަށް އަލުން ހުށަހެޅިދާނެކަމަށް އަންގައި)

ސުޕްރީމް ކޯޓުގެ ޢާއްމު ސިޓީއާއި ހެކީގެ ޤާނޫނުގެ ދަށުން އައިޑީ ކާޑަކީ އެންމެ ސައްޙަކަން ބޮޑު ރަސްމީ ލިޔުންކަމާއި، އޭނާ އިޤުރާރުވި މަޢުލޫމާތާ ދެކޮޅު ހަރުދަނާ ހެކި ހުށަހަޅަންޖެހޭ ބުރަ ނުއުފުލޭތީ ޙުކުމް ޤާއިމްކޮށް، ފަހުން ފާހަގަކުރި އައު ކަމަކީ މުހިއްމު ކަމަކަށްވާތީ ހެކިތަކާއެކު ދަށުކޯޓަށް އަލުން ހުށަހެޅުމުގެ ފުރުޞަތު ދިން.