ސައިޓޭޝަން ކޮޕީ ކުރުމަށް
ކުރު ސައިޓޭޝަން
2021/HC-A/61
ދިވެހި
އިބްރާހީމް ރަޝީދު ވ. ޑިޕާޓްމަންޓް އޮފް ނެޝަނަލް ރެޖިސްޓްރޭޝަން، 2021/HC-A/61
English
Ibrahim Rasheed v. Dipaatmant of Neshanal Rejistreyshan 2021/HC-A/61 (2021/HC-A/61, High Court of the Maldives, 8 March 2023)
އިބްރާހީމް ރަޝީދު ވ. ޑިޕާޓްމަންޓް އޮފް ނެޝަނަލް ރެޖިސްޓްރޭޝަން
މައިގަނޑު ސުވާލު
އައިޑީކާޑުގައިވާ އުފަން ތާރީޚް ބަދަލުކުރުމަށް އެދުނު މައްސަލައިގައި، ބޭބެއަށްވުރެ އުމުރުން ދޮށިވުން ފަދަ ޙާލަތެއް ދައްކައިގެން ހުށަހެޅި ޝަފަހީ ހެކިން ނުގެނެސް ސިވިލް ކޯޓުން މައްސަލަ ނިންމުމަކީ ސުޕްރީމް ކޯޓުގެ 2016/03 ޢާއްމު ސިޓީއާ ޚިލާފު ކަމެއްތޯ.
ނިންމި ގޮތް
އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް
ކަނޑައެޅުނު އުޞޫލުތައް
- ސުޕްރީމް ކޯޓުގެ 2016/03 ޢާއްމު ސިޓީއަކީ ޢުމުރު ބަދަލުކުރުމަށް އެދޭ މައްސަލަތައް ބަލަންވީ ގޮތް ބަޔާންކުރާ އުޞޫލެއް ކަމުން، އެ ސިޓީ ޢަމަލުކުރަމުންދިޔަ ދުވަސްވަރު ނިންމި މައްސަލަތައް ބަލަންވާނީ އެ ސިޓީގައިވާ ގޮތުގެ މަތިންނެވެ. (ޙުކުމްގެ ޕެރެގްރާފް ނަންބަރު 25)
- ހެކިންގެ ލިސްޓަކީ ކޯޓުން ކަނޑައަޅާފައިވާ ފޯމެޓަކަށް ތައްޔާރުކުރާ ލިސްޓެއް ކަމުން، 'ޝަރީޢަތުން ފައިސަލާކުރާނީ މި ލިޔުމުގައިވާ ހެކިންގެ މައްޗަށް އެކަނި، އިތުރު ހެކިން ހުށަހެޅުމުގެ ފުރުޞަތެއް ނުލިބޭނެ' ކަމަށް އޭގައިވާ ޢިބާރާތަކީ ހެކިން ހުށަހަޅާ ފަރާތްތަކަށް ކޯޓުން ދުރާލާ ދީފައިވާ އެންގުމެއް ކަމުގައި ބެލެވެއެވެ. (ޙުކުމްގެ ޕެރެގްރާފް ނަންބަރު 35)
- އުފަން ތާރީޚް އަންގައިދޭ ރަސްމީ ލިޔުމެއް އޮތްނަމަ ބަލަންވާނީ އެ ލިޔުމަށް؛ ރަސްމީ ލިޔުމުގައިވާ ތާރީޚް ރަނގަޅުނޫންކަމަށް ބުނާ ކޮންމެ ފަހަރަކު ހެކިން ޙާޟިރުކުރުން ލާޒިމެއް ނުވެ، ހެކިން ޙާޟިރުކުރަންޖެހޭނީ ރަސްމީ ލިޔުމުގައިވާ ޢުމުރަކީ އަޞްލު ޢުމުރު ނޫންކަމަށް ސަލާމަތް ބުއްދިއަށް ޤަބޫލުކުރެވޭ ޙާލަތެއް އޮވެގެންނެވެ. (ޙުކުމްގެ ޕެރެގްރާފް ނަންބަރު 37)
- އައިޑީކާޑު ހެއްދުމަށް ހުށަހަޅާ ފޯމުގައި ތެދު މަޢުލޫމާތުކަމަށް އިޤްރާރުވެ ދީފައިވާ އުފަން ތާރީޚާއި ގޭގެ މީހުންގެ ރަޖިސްޓްރީގައިވާ ތާރީޚާއި އެއްބަނޑު އެއްބަފާ ކޮއްކޮއެއްގެ އުފަން އަހަރާ އަޅާބަލާއިރު، ދަޢުވާކުރާ ތާރީޚަކީ ސަލާމަތް ބުއްދިއަށް ޤަބޫލުކުރެވޭ ތާރީޚަކަށް ނުވާނަމަ، ސުޕްރީމް ކޯޓުގެ ސިޓީގައިވާ ޙާލަތު މެދުވެރިވެފައިވާކަމަށް ނުބެލެވޭނެއެވެ. (ޙުކުމްގެ ޕެރެގްރާފް ނަންބަރު 38)
- ހެކިން ހުށަހެޅުމަށް ފުރުޞަތު ތަނަވަސްކޮށްދޭންޖެހޭ މިންވަރަކަށް ދަޢުވާގެ ތެދުކަން ބަޔާންކޮށްދެވިފައި ނެތްނަމަ، ދަޢުވާކުރާ ފަރާތުގެ އަޞްލު އުފަން ތާރީޚް ސާބިތުކުރުމަށް ނޫން އެހެން ކަމަކަށް ހުށަހެޅި ޝަފަހީ ހެކިން ޙާޟިރުނުކޮށް މައްސަލަ ނިންމުމަކީ ސުޕްރީމް ކޯޓުގެ ޢާއްމު ސިޓީއާ ޚިލާފު ކަމެއް ނޫނެވެ. (ޙުކުމްގެ ޕެރެގްރާފް ނަންބަރު 36، 39)
- ދަށުކޯޓުން ހުށަހެޅި ކަންކަމަށް ރިޢާޔަތްނުކޮށްފައިވާކަމަށް އިސްތިއުނާފުގައި ބުނާނަމަ، ރިޢާޔަތްނުކުރި ކަމަކީ ކޮބައިކަމާއި އެކަމަށް ރިޢާޔަތްކުރިނަމަ ނުކުންނާނެ ތަފާތު ޤާނޫނީ ނަތީޖާއަކީ ކޮބައިކަން އިސްތިއުނާފުކުރާ ފަރާތުން ބަޔާންކޮށްދޭންވާނެއެވެ. (ޙުކުމްގެ ޕެރެގްރާފް ނަންބަރު 40)
- ސުޕްރީމް ކޯޓުގެ 2016/03 ޢާއްމު ސިޓީ (ޢުމުރު ބަދަލުކުރުމަށް އެދޭ މައްސަލަތައް) - ލިޔުމުގައި '1 ވަނަ ނަންބަރު'
- އިސްތިއުނާފުކުރި ފަރާތުގެ ވަކީލުން
- ޖަޢުފަރު ރަޝީދު
- ޖަވާބުދާރީވި ފަރާތުގެ ވަކީލުން
- ޙައްމާދު ވާފިރު، އެޓަރނީ ޖެނެރަލްގެ އޮފީސް
- ބެންޗު
- ޙަސަން ޝަފީޢު، މުޙައްމަދު ފައިޞަލް، މުޙައްމަދު ސަލީމް
- ރައުޔު ލިޔުނު ފަނޑިޔާރު
- ޙަސަން ޝަފީޢު · ތާއީދުކުރެއްވީ: މުޙައްމަދު ފައިޞަލް، މުޙައްމަދު ސަލީމް
- ޚިލާފު ރައުޔު
- ނެތް