މުޙައްމަދު ޢަބްދުﷲ ވ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް

ވަކިކުރީ އެކަށީގެންވާ ސަބަބެއް ނެތިކަމަށް ކަނޑައަޅައި، ނަމަވެސް އިތުބާރު ގެއްލިފައިވާތީ ވަޒީފާ އަނބުރާ ނުދީ ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ ދަށުން 60,405.60 ރުފިޔާ ބަދަލު ނަގައިދިނުމަށް ޓްރައިބިއުނަލުން ނިންމިއެވެ.

އެމް.އޭ.ސީ.އެލްގެ ރީފިއުލަރ އޮޕަރޭޓަރ، އެއަރޕޯޓުގެ ބައުޒަރަކުން ޖެޓް ފިއުލް ވަގަށް ނެގުމުގައި ބައިވެރިވިކަމުގެ ތުހުމަތުގައި ބަންދުކޮށް، މައްސަލަ ނުނިމެނީސް 1 ޑިސެމްބަރު 2015 ގައި ވަޒީފާއިން ވަކިކުރިއެވެ.

މުވައްޒަފު ބުނީ ޓްރައިބިއުނަލުގެ ނިންމުމަކީ ވަޒީފާއާބެހޭ ޤާނޫނުގެ 29 ވަނަ މާއްދާއާ ޚިލާފު ނިންމުމެއް ކަމަށެވެ.

ވަޒީފާއިން ވަކިކުރީ އެކަށީގެންވާ ސަބަބެއް ނެތިކަމަށް ކަނޑައަޅާފައިވަނިކޮށް، ދެފަރާތުގެ މެދުގައި އިތުބާރު ގެއްލިފައިވާތީ ވަޒީފާ އަނބުރާ ނުދީ ވަޒީފާއާބެހޭ ޤާނޫނުގެ 29 ވަނަ މާއްދާގެ ދަށުން ބަދަލު ނަގައިދިނުމަށް ޓްރައިބިއުނަލުން ނިންމުން ޞައްޙަތޯ.

ބައެއް ބަދަލުކުރި: ބަދަލު ނަގައިދިނުމުގެ ނިންމުން ބާޠިލުކޮށް ވަޒީފާއަށް އަނބުރާ އިޢާދަކުރުމަށް އަމުރުކުރި

ވައްކަމުގައި މުވައްޒަފުގެ ބައިވެރިވުމެއް ނެތްކަން ޓްރައިބިއުނަލާއި 2016/HC-A/433 ގައި ފާހަގަކޮށްފައިވާއިރު، އިތުބާރު ގެއްލުނުކަމަށް ބަލަންޖެހޭ ސަބަބެއް ކުންފުނިން ހުށަނާޅާތީ، އިތުބާރު ގެއްލުނުކަމަށް ކަނޑައެޅުން އަސާސެއް ނެތް ނިންމުމެކެވެ.