އަސްފާޤު ވަޙީދު ވ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް

ވަޒީފާއާބެހޭ ޓްރައިބިއުނަލުން ނިންމީ ވަކިކުރީ އެކަށީގެންވާ ސަބަބެއް ނެތި ކަމަށާއި، ނަމަވެސް ދެފަރާތުގެ މެދުގައި އިތުބާރު ގެއްލިފައިވާތީ ވަޒީފާއަށް ރުޖޫޢު ނުކޮށް ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ ދަށުން 34,800 ރުފިޔާ ބަދަލު ދިނުމަށެވެ.

އިސްތިއުނާފުކުރި ފަރާތް މޯލްޑިވްސް އެއަރޕޯޓްސް ކޮމްޕެނީގައި ބެގޭޖް ހޭންޑްލަރެއްގެ ގޮތުގައި ހުއްޓައި، ފްލައިޓެއްގެ ފަސިންޖަރެއްގެ ދަބަހުން ތަކެތި ނަގާފައިވާކަން ސީސީޓީވީއިން ފެނުނު ކަމަށް ބުނެ ވަޒީފާއާބެހޭ ޤާނޫނުގެ 23 (ހ) ގެ ދަށުން ނޯޓިސް ނުދީ ވަކިކުރިއެވެ.

އިސްތިއުނާފުކުރި ފަރާތުން ބުނީ ވަކިކުރީ ނުހައްޤުން ކަމަށް ކަނޑައަޅާފައިވާއިރު ވަޒީފާއަށް ރުޖޫޢު ނުކުރުމަށް ޝަރުޢީ ނުވަތަ ޤާނޫނީ ސަބަބެއް ނެތް ކަމަށާއި، 29 (ހ) (1) އަދި (2) ގެ ދަށުން އަމުރުނުކޮށް (3) ގެ ދަށުން ބަދަލު ދިނުމަކީ ޤާނޫނާ ޚިލާފު ކަމަށެވެ.

ވަޒީފާއިން ވަކިކުރީ އެކަށީގެންވާ ސަބަބެއް ނެތިކަމަށް ޓްރައިބިއުނަލުން ކަނޑައެޅުމަށްފަހު، މުވައްޒަފު ވަޒީފާއަށް އަނބުރާ ރުޖޫޢު ނުކޮށް ވަޒީފާއާބެހޭ ޤާނޫނުގެ 29 ވަނަ މާއްދާގެ ދަށުން ހަމައެކަނި ބަދަލު ދިނުމަށް ނިންމުން ޞައްޙަތޯ.

ޓްރައިބިއުނަލުގެ ނިންމުން ބާޠިލު، ވަޒީފާއަށް ރުޖޫޢުކޮށް މުސާރައާއި ޢިނާޔަތް ދިނުމަށް ޙުކުމްކުރި

ސީސީޓީވީގައި ދަބަސް ހުޅުވައި އެއްޗެއް ނަގަނިކޮށް ނުފެނޭތީ ތުހުމަތު ޘާބިތުނުވާކަމާއި، ތަޙްޤީޤެއް ނުކޮށް ޖަވާބުދާރީވުމުގެ ފުރުޞަތު ނުދީ ވަކިކުރީތީ މައުޟޫޢީ އަދި އިޖްރާޢީ ޢަދުލުވެރިކަން ނެތްކަމާއި، ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ ދަށުން ފުރަތަމަ ބަލަންވީ ރުޖޫޢުކުރުމަށް ކަމުން ޓްރައިބިއުނަލުގެ ނިންމުން ބާޠިލުކުރިއެވެ.