ޙަސަން ޢަލީ ވ. ފިއުލް ސަޕްލައިސް މޯލްޑިވްސް ޕވޓ ލޓޑ

ވަކިކުރީ އެކަށީގެންވާ ސަބަބެއް ނެތިކަމަށް ކަނޑައަޅައި، މުވައްޒަފަކީ ތެޔޮ ޓޭންކަކަށް ފެން އެޅިކަމުގެ ތުހުމަތުގައި ފިޔަވަޅު އެޅިފައިވާ މީހެއްކަމުން ވަޒީފާ އަނބުރާ ދިނުމަށްވުރެ ބަދަލު ދިނުން ޢަދުލުވެރިކަމަށް ބުނެ، 29(ރ) ގެ ދަށުން 3 މަހުގެ މުސާރައާއި ޢިނާޔަތް (ނޯޓިސް ފައިސާ އުނިކޮށް 20,900 ރުފިޔާ) ދިނުމަށް ޓްރައިބިއުނަލުން ނިންމިއެވެ.

ފިއުލް ސަޕްލައިސް މޯލްޑިވްސްގެ ބާރޖް ކްރޫއެއްގެ މަޤާމުގައި ހުރި މުވައްޒަފު، ވަޒީފާގެ އޮނިގަނޑަށް އައި ބަދަލަކާ ގުޅިގެން ރިޑަންޑަންޓް ކުރެވުނު ކަމަށްބުނެ އިންޒާރެއް ނުދީ 28 އޮކްޓޫބަރު 2017 ގައި ވަޒީފާއިން ވަކިކުރިއެވެ.

މުވައްޒަފުގެ ފަރާތުން ބުނީ 29(ހ)(1)،(2) ގެ ދަށުން ވަޒީފާ އިޢާދަނުކޮށް ބަދަލު ދިނުމަށް ނިންމީ 29(ށ) ގެ ހަމަތަކާ ޚިލާފަށް ކަމަށާއި، ތެޔޮ ޓޭންކަށް ފެން އެޅިކަމުގެ ތުހުމަތުގައި ފިޔަވަޅު އެޅިކަމުގެ ހެއްކެއް ނެތި އެކަން ކަނޑައެޅީ ހެކީގެ ޝަރުޢީ ހަމަތަކާ ޚިލާފަށް ކަމަށެވެ.

އެކަށީގެންވާ ސަބަބެއް ނެތި ވަޒީފާއިން ވަކިކުރިކަން ކަނޑައެޅުމަށްފަހު، ހެއްކަކުން ސާބިތުނުވާ ތުހުމަތެއްގެ މައްޗަށް ބިނާކޮށް ވަޒީފާ އިޢާދަނުކޮށް ހަމައެކަނި ބަދަލު ދިނުމަށް ވަޒީފާއާބެހޭ ޓްރައިބިއުނަލުން ނިންމުން ޤާނޫނާ އެއްގޮތްތޯއާއި، ވަޒީފާއާބެހޭ ޤާނޫނުގެ 29 ވަނަ މާއްދާގެ ދަށުން އަމުރު ނެރުމުގައި ބަލަންޖެހޭ ތަރުތީބު.

ބައެއް ބަދަލުކުރި؛ ބަދަލު ދިނުމަށް ކަނޑައެޅި ބައި ބާޠިލުކޮށް ވަޒީފާ އިޢާދަކުރުމަށް އަމުރުކުރި

ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ ދަށުން ފުރަތަމަ ބަލަންޖެހެނީ ވަޒީފާ އިޢާދަކުރުމަށް ކަމާއި، ތުހުމަތުގައި ފިޔަވަޅު އެޅިކަމުގެ އެއްވެސް ލިޔުމެއް ނުވަތަ ހެއްކެއް ނެތި ހަމައެކަނި ކުންފުނީގެ ބުނުމަށް ބަލައި ވަޒީފާ އިޢާދަނުކުރުމަށް ނިންމީ ރަނގަޅަށް ނޫންކަމަށް ހައިކޯޓުން ކަނޑައެޅިއެވެ.