ޚަދީޖާ ޢަބްދުއްރަޙްމާން ވ. ސަކީނާ ޢަބްދުއްރަޙްމާން

ސިވިލް ކޯޓުން، ގޯޅިން އިސްތިއުނާފުކުރި ފަރާތަށް 12.28 އަކަފޫޓާއި ދެން ތިބި ފަސް ބެހެނިވެރިންނަށް 61.41 އަކަފޫޓު އެ ފަރާތްތަކުގެ ބަޔަށް އެއްކޮށްދެވޭނެކަމަށް ޙުކުމްކުރިއެވެ.

ސިވިލް ކޯޓުގެ 1551/Cv-C/2011 ޤަޟިއްޔާގައި ބެހެނިވެރިން އެއްބަސްވެގެން ގޯތި ދެބަޔަށް ބައިކޮށް، 73.69 އަކަފޫޓުގެ 4 ފޫޓު ފުޅާ ގޯޅިއެއް ނަގައިގެން ބިން ޢައްޔަންކުރިއެވެ. ފަހުން ބެހެނިވެރިޔަކު ގޯޅީގެ ބިން ބެހެނިވެރިންގެ ނިސްބަތުން ބަހައި ދެބިމަށް އެއްކޮށްދިނުމަށް ދަޢުވާކުރިއެވެ.

އިސްތިއުނާފުކުރި ފަރާތް ބުނީ، ބެހެނިވެރިންގެ އެއްބަސްވުމުގެ މައްޗަށް ކުރި ޙުކުމަކަށް ހަމަ އެ ކޯޓުން ބަދަލުގެނައުމަކީ ހައިކޯޓުގެ 2012/HC-A/305 ގައިވާ ރެސްޖުޑިކާޓާގެ އުޞޫލާއި ސުޕްރީމް ކޯޓުގެ 2011/SC-SJ/03 އަމުރާ ޚިލާފު ކަމަށާއި، ގޯޅީގެ ފުޅާމިން 4 ފޫޓަށްވުރެ ކުޑަވެ މާލޭ ޕްލޭނިންގ ގަވާއިދާ ޚިލާފުވެ ޢިމާރާތްތަކުގެ ބޭނުންކުރުމުގެ ހުއްދަ ބާޠިލުވާނެކަމަށެވެ.

ކުރިން ބެހެނިވެރިން އެއްބަސްވެގެން ބިން ޢައްޔަންކޮށް ނިންމި ޤަޟިއްޔާއެއްގައި ގޯތިން ނެގި ގޯޅީގެ ބިން، ބެހެނިވެރިންގެ ނިސްބަތުން ބަހައި ޢައްޔަންކުރެވުނު ދެބަޔަށް އެއްކޮށްދިނުމަށް ސިވިލް ކޯޓުން ފަހުން ނިންމުމަކީ ރެސްޖުޑިކާޓާގެ އުޞޫލާއި މާލޭ ޕްލޭނިންގ ގަވާއިދާ ޚިލާފު ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (އަޣްލަބިއްޔަތުން)

އަޣްލަބިއްޔަތު ރައުޔަކީ، ގޯޅީގެ ބިމަކީ ހުރިހާ ބެހެނިވެރިންގެ ޙައްޤު އޮތް ބިމެއްކަމާއި، ދެބައިވެސް މަގަށް އިންވެފައިވާތީ ބިން އެއްކޮށްދިނުމުން ވަދެނިކުތުމަށް ހުރަހެއް ނާންނާނެ ކަމެވެ. ޚިލާފުވި ފަނޑިޔާރުގެ ރައުޔަކީ، މި ދަޢުވާއަކީ ބެހެނިވެރިން އެއްބަސްވެގެން ކުރިން ނިންމާފައިވާ މައުޟޫޢެއް އަލުން ހުޅުވާލުމެއްކަމުން ރެސްޖުޑިކާޓާގެ އުޞޫލުން ދަށުކޯޓުގެ ޙުކުމް ބާޠިލުކުރަންޖެހޭނެ ކަމެވެ.