އިސްމާޢީލް އަޙްސަން ވ. ޕްރޮސިކިއުޓަރ ޖެނެރަލް

މެޖިސްޓްރޭޓް ކޯޓުން ނިންމީ، ހުށަހެޅުންތަކަކީ މައްސަލަ މައުޟޫޢީ ގޮތުން ކުރިއަށް ގެންދިޔުމަށް ހުރަހަކަށް ވާ ހުށަހެޅުންތަކެއް ނޫންކަމަށާއި ދަޢުވާ ކުރިއަށް ގެންދިއުމަށެވެ.

ފުލުހުންގެ ޚާއްޞަ އޮޕަރޭޝަނެއްގައި ޕާރްސަލަކާ ޙަވާލުވިއިރު ހުއްޓުވުމުން ޕާރްސަލުން 4.7279 ގްރާމް ޑައިމޯފިން ފެނުނުކަމަށް ބުނެ، އިސްތިއުނާފުކުރި ފަރާތުގެ މައްޗަށް ޓްރެފިކްކުރުމުގެ ދަޢުވާ އުފުލުނެވެ. ދިފާޢުން ޗެއިން އޮފް ކަސްޓަޑީ، ކޮންޓްރޯލްޑް ޑެލިވަރީގެ ހުއްދަ ފަދަ ކަންކަމާ ގުޅޭ ޝަރީޢަތުގެ ކުރީ ހުށަހެޅުންތައް ހުށަހެޅިއެވެ.

އިސްތިއުނާފުކުރި ފަރާތުން ބުނީ ނިންމުމަކީ ޗެއިން އޮފް ކަސްޓަޑީގެ އުޞޫލާ ޚިލާފު، ސަބަބު ނުބުނާ، އަދި އަޑުއެހުމެއް ނުބާއްވާ ނިންމި ނިންމުމެއް ކަމަށެވެ. ދައުލަތުން ބުނީ ގަވާއިދު ރަޖުޢީކޮށް ނުހިނގާނެކަމަށާއި، ސަބަބުތައް ތަފްޞީލުކޮށްފައިވާކަމަށާއި، އިޖުރާއީ ގޯހެއް ނެތްކަމަށެވެ.

ޑައިމޯފިން ޓްރެފިކްކުރުމުގެ މައްސަލައެއްގައި ދިފާޢުން ހުށަހެޅި ޝަރީޢަތުގެ ކުރިން ހުށަހަޅާ ހުށަހެޅުންތަކާމެދު، އަޑުއެހުމެއް ބާއްވައި ދެފަރާތަށް ބަހުސްކުރުމުގެ ފުރުޞަތު ނުދީ ކުޅުދުއްފުށީ މެޖިސްޓްރޭޓް ކޯޓުން ގޮތެއް ނިންމުމަކީ ޖިނާއީ އިޖުރާއަތުގެ ޤާނޫނާ ޚިލާފު ކަމެއްތޯ.

ދަށުކޯޓުގެ ނިންމުން ބާޠިލުކޮށް، އަޑުއެހުން ބާއްވައި ގޮތެއް ނިންމުމަށް ކުޅުދުއްފުށީ މެޖިސްޓްރޭޓް ކޯޓަށް ތަޙުވީލުކުރި

ދިފާޢުން ހުށަހެޅުންތައް އިއްވި އަޑުއެހުމުގައި ދައުލަތުގެ ރައްދު ދިފާޢަށް ނުލިބިފައިވާތީ އަޑުއެހުން ކުރުކޮށްލުމަށްފަހު، ބަހުސްކުރުމުގެ ފުރުޞަތު ނުދީ ނިންމާފައިވާތީ، ޤާނޫނުގެ އިޖުރާއަތާއި ޢަދުލުވެރި ޝަރީޢަތުގެ ޙައްޤާ ޚިލާފުވުން.