2016/HC-A/451

ކްރިމިނަލް ކޯޓުން ކެނަބިސް ޓްރެފިކްކުރުމުގެ ކުށުން ކުށްވެރިކޮށް ޢުމުރަށް ޖަލަށްލުމާއެކު 100,000 ރުފިޔާގެ ޖޫރިމަނާ ކޮށް، ޖީބުން ފެނުނު ފައިސާ ދައުލަތަށް ނެގުމަށް އަމުރުކުރިއެވެ.

ފުލުހުންގެ އޮޕަރޭޝަނެއްގައި އެހެން މީހަކު ކޮތަޅެއް ޙަވާލުކުރިކަމަށް ބުނެ ހައްޔަރުކުރުމަށްފަހު، މަގުމަތިން ނެގި ކޮތަޅެއްގައި ހުރި ދަޅުތަކުން 126.6282 ގްރާމް ކެނަބިސް ފެނުނެވެ. އިސްތިއުނާފުކުރި ފަރާތުގެ ޖީބުން 52385 ރުފިޔާ ފެނުނެވެ.

އިސްތިއުނާފުކުރި ފަރާތުން ބުނީ މަގުމަތިން ފެނުނު ކޮތަޅަކީ އޭނާގެ ޙިޔާޒަތުގައި ހުރި އެއްޗެއް ނޫންކަމަށާއި، ޗެއިން އޮފް ކަސްޓަޑީގައި ސުވާލު އުފެދޭކަމަށާއި، ހެކިބަހުގައި ފުށުއެރުން ހުރިކަމަށާއި، ފައިސާއަކީ ކްލަބުގެ ފައިސާކަމަށެވެ.

ކެނަބިސް ޓްރެފިކްކުރުމުގެ ކުށުގައި ކުށްވެރިކުރީ، ބިންމަތިން ފެނުނު ކޮތަޅަކީ މުއްތަހަމުގެ ޙިޔާޒަތުގައި ހުރި އެއްޗެއްކަމާއި، އަތުލައިގަނެވުނު ތަކެތީގެ ޗެއިން އޮފް ކަސްޓަޑީ މެދުނުކެނޑި ގުޅިފައިވާކަން ސާބިތުނުވާއިރު، އެކަށީގެންވާ ޝައްކެއްނެތި ދަޢުވާ ސާބިތުވޭތޯއާއި، އޭނާގެ ޖީބުން ފެނުނު ފައިސާ ދައުލަތަށް ނެގުން ޞައްޙަތޯ.

ކުށްވެރިކުރި ޙުކުމާއި ފައިސާ ދައުލަތަށް ނެގުމަށް ކުރި އަމުރު ބާޠިލު (އިސްތިއުނާފުކުރި ފަރާތާ ގުޅޭ ބައި)

ޙިޔާޒަތާ ބެހޭ ގޮތުން ދަށުކޯޓުގެ ނިންމުމަކީ ސުޕްރީމް ކޯޓުގެ އުޞޫލާ ފުށުއަރާ ކަމެއް ނޫންނަމަވެސް، ކޮތަޅު ވައްޓާލިތަން ފެނުނުކަމަށް އެއްވެސް ހެއްކަކު ސާފުކޮށް ހެކިބަސް ނުދޭތީއާއި، ޗެއިން އޮފް ކަސްޓަޑީ ފޯމުން ތަކެތި ޙަވާލުވި ފަރާތްތައް ސިލްސިލާކޮށް ނޭނގޭތީ، ދަޢުވާ އެކަށީގެންވާ ޝައްކެއްނެތި ސާބިތުނުވެއެވެ.