އިޝްފާޤު ވަހީދު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ތުހުމަތުކުރެވޭ ފަރާތް ދުވަސްތަކެއްގެ ބަންދަށް ފޮނުވިއެވެ.

މަސްތުވާތަކެތީގެ ވިޔަފާރީގެ ތުހުމަތުގައި ހައްޔަރުކުރެވުނު ފަރާތެއްގެ ވަކީލަކު ޢައްޔަންކުރުމަށް އެދޭ ފޯމު ރޭގަނޑު ފުލުހުންނަށް ފޮނުވިނަމަވެސް، ފުލުހުން އެ ފޯމު ޕްރޮސެސްކުރީ ހެނދުނު ރަސްމީ ގަޑި ފެށުމުންނެވެ؛ ބަންދުގެ އަޑުއެހުމަށް ހާޟިރުކުރިއިރު ވަކީލަށް މަޢުލޫމާތު ނުދީ ވަކީލު ޢައްޔަންނުކުރާކަމަށް ކޯޓަށް އަންގާފައިވެއެވެ.

އިސްތިއުނާފުކުރި ފަރާތް ބުނީ ޤާނޫނުއަސާސީން ކަށަވަރުކޮށްދޭ ވަކީލެއްގެ ފުރުޞަތު ނުދީ ބަންދާމެދު ގޮތެއް ނިންމި ކަމަށެވެ. ދައުލަތުން ބުނީ ފޯންކޯލް ފުރުޞަތުގައި ވަކީލު ނުބޭނުންވާކަމަށް ބުނެ ސޮއިކުރުމުން އެ ޙައްޤު ދޫކޮށްލީ ކަމަށާއި ވަކީލު ލިބުނަސް ނަތީޖާ ބަދަލުނުވާނެ ކަމަށެވެ.

ބަންދާމެދު ގޮތެއް ނިންމުމަށް ކޯޓަށް ހާޟިރުކުރިއިރު ތުހުމަތުކުރެވޭ ފަރާތަށް ޢައްޔަންކުރެވިފައިވާ ޤާނޫނީ ވަކީލަށް ފުލުހުން ނާންގާ ވަކީލެއްގެ އެހީ ނުލިބި ނެރުނު ބަންދު އަމުރަކީ ބާޠިލު އަމުރެއްތޯ، އަދި ވަކީލު ނުބޭނުންވާކަމަށް ކުރިން ބުނުމުން އެ ޙައްޤު ދޫކޮށްލީކަމަށް ބެލެވޭތޯ.

ކްރިމިނަލް ކޯޓުގެ ބަންދު އަމުރު ބާޠިލު

ފުލުހުން ވަކީލު ޢައްޔަންކުރުމުގެ ހުށަހެޅުން ޕްރޮސެސްކުރުން ލަސްކޮށް ވަކީލަށް މަޢުލޫމާތު ނުދިނުމުން 48 (ށ) ގެ ޙައްޤަށް އުނިކަން އައެވެ؛ ފަހުން ވަކީލު ޢައްޔަންކުރުމަށް ސޮއިކޮށްފައިވާތީ ޙައްޤު ދޫކޮށްލީކަމަށް ނުބެލެވޭނެއެވެ؛ ގެއްލުނު އަސާސީ ޙައްޤު ރަނގަޅުކުރެވޭނެ ގޮތެއް ދައުލަތަކަށް ނުދެއްކުނެވެ.