މުޙައްމަދު ރަޝީދު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން މުޖުތަމަޢުގެ ސަލާމަތަށްޓަކައި 5 ދުވަހަށް ކަސްޓޯޑިއަލް ޖަލެއްގައި ބަންދުގައި ބެހެއްޓުމަށް އަމުރުކުރިއެވެ.

ޖަލްސާއަކަށްފަހު އެއްވެ އުޅުމުގެ ޤާނޫނާ ޚިލާފަށް މަގުމައްޗަށް އެއްވެ އަޑުގަދަކޮށް ޓްރެފިކަށް ދަތިކޮށް ފުލުހުންގެ ދައުރަށް ހުރަސްއެޅިކަމުގެ (އަމުރަށް ނުކިޔަމަންތެރިވުމުގެ) ތުހުމަތުގައި އިސްތިއުނާފުކުރި ފަރާތް ހައްޔަރުކުރެވުނެވެ.

އިސްތިއުނާފުކުރި ފަރާތުން ބުނީ ވަކީލުގެ ޙައްޤުން މަޙްރޫމްކޮށް ވަކީލު ނެތި ބަންދުކުރި ކަމަށާއި، ޖިނާއީ އިޖުރާއަތުގެ ޤާނޫނުގެ 22 ގައިވާ ކުށެއް ނެތި ބަންދުކުރި ކަމަށާއި، ޤަވާއިދުގެ 13 (ނ) ގައިވާ ކަންކަމަށް ރިޢާޔަތްނުކުރި ކަމަށެވެ. ދައުލަތުން ބުނީ ކުށް ތަކުރާރުވެދާނެތީ މުޖުތަމަޢުގެ ސަލާމަތަށް ބަންދަށް އެދުނު ކަމަށެވެ.

މުޖުތަމަޢުގެ ސަލާމަތަށްޓަކައި 5 ދުވަހަށް ބަންދުގައި ބެހެއްޓުމަށް ކްރިމިނަލް ކޯޓުން ނެރުނު އަމުރު، ތުހުމަތުކުރެވޭ ފަރާތުގެ ވަކީލު ހާޒިރުނުކޮށް ނެރުމާއި، ޤަވާއިދުގެ 13 ވަނަ މާއްދާގެ (ނ) ގައިވާ ކަންކަމަށް ރިޢާޔަތްކުރިކަން ސާފުނުކުރުމުން ޤާނޫނާ ޚިލާފުތޯ.

ދަށުކޯޓުގެ އަމުރު ބާޠިލު

ވަކީލު ހަމަޖައްސާފައިވާކަން އެނގި ތިބެ ވަކީލަށް ހާޒިރުވާ ފުރުޞަތު ނުދީ ކޯޓަށް ހާޒިރުކުރުމުން 48 (ށ) ގެ ޙައްޤުން މަޙްރޫމްވިއެވެ. ކުށުގެ ރެކޯޑެއް ނެތް މީހަކު މުޖުތަމަޢުގެ ސަލާމަތަށް ބަންދުކުރުމުގައި 13 (ނ) ގެ ކޮން ކަމަކަށް ރިޢާޔަތްކުރިކަން ސާފުނުވާތީ އަމުރު ބާޠިލުކުރެވުނެވެ.