އިބްރާހީމް ޔޫސުފް ވ. ދާއޫދު

ސިވިލް ކޯޓުން ކަނޑައެޅީ އެއްބަސްވުމުގެ ދަށުން މަސައްކަތެއް ކޮށްދީފައިވާކަން ނޭނގޭތީ، އުޖޫރަ، ގެއްލުމުގެ ބަދަލާއި ވަކީލު ފީ ހޯދުމަށް ކުރި ދަޢުވާ ސާބިތު ނުވާކަމަށެވެ.

ދާއޫދުގެ ފައިބަރު ދޯނި ވިއްކުމާއި ބޭންކް ލޯނު ހަމަޖެއްސުމުގެ މަސައްކަތް ކުރުމަށް އިބްރާހީމް ޔޫސުފާއި އެހެން މީހަކާ އެކު 2015 ގައި އެއްބަސްވެ، އުޖޫރަ ލިބޭނެކަމުގެ ޔަޤީންކަމަށް ޖުމްލަ 400,000 ރުފިޔާގެ 2 ޗެކު ދޫކުރިއެވެ. ދާއޫދު ޗެކުތަކަށް ފައިސާ ނުދޭން ބޭންކަށް އެންގިއެވެ.

އިބްރާހީމް ޔޫސުފް ބުނީ ޙުކުމަކީ ފައިސާއަށް ބަދަލުކުރެވޭ ލިޔުމާބެހޭ ޤާނޫނާއި 2012/SC-A/22 އާއި 2013/SC-A/29 އާއި އެއްބަސްވުމުގެ 5 އަދި 6 ވަނަ މާއްދާއާ ޚިލާފު ޙުކުމެއް ކަމަށެވެ. ދާއޫދު ބުނީ ޗެކުތަކަކީ ފުރިހަމަ ނުކޮށް ދޫކުރި ޗެކުތައް ކަމަށާއި، މަސައްކަތެއް ނުކޮށް ތާރީޚު ޖަހާފައިވާ ކަމަށެވެ.

މަސައްކަތުގެ އުޖޫރަ ލިބޭނެކަމުގެ ޔަޤީންކަމަށް ދޫކުރި ޗެކުތަކުގެ ފައިސާއާއި ގެއްލުމުގެ ބަދަލު ހޯދުމަށް ކުރި ދަޢުވާގައި، ފައިސާއަށް ބަދަލުކުރެވޭ ލިޔުމާބެހޭ ޤާނޫނާއި ސުޕްރީމް ކޯޓުގެ ޤަޟިއްޔާތަކާއި އެއްބަސްވުމުގެ މާއްދާތަކާ ޚިލާފަށް ސިވިލް ކޯޓުން ދަޢުވާ ސާބިތުނުވާކަމަށް ނިންމީތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޗެކުތަކަކީ މަސައްކަތް ފުރިހަމަވުމުން އުޖޫރަ ލިބޭނެކަމުގެ ޔަޤީންކަމަށް ދޫކުރި ޗެކުތަކެވެ. މަސައްކަތް ކުރިކަމާއި ދާއޫދު އެއްބަސްވުމާ ޚިލާފުވިކަން ސާބިތުކުރާނެ ހެއްކެއް ދަޢުވާކުރި ފަރާތުން ހުށަނާޅާތީ ދަޢުވާ ސާބިތު ނުވެއެވެ.