ޢަބްދުﷲ މާނިޢު ވ. ރޯޔަލް ސަޕްލައި ޕވޓ ލޓޑ

ސިވިލް ކޯޓުން ފައިސާ ދައްކަންޖެހޭކަން ސާބިތުވާކަމަށް ކަނޑައަޅައި ވަކި މުއްދަތެއްގެ ތެރޭގައި ބައިބަޔަށް ދައްކާ ޚަލާޞްކުރުމަށް ޙުކުމްކުރިއެވެ. އިންވޮއިސްގެ ޖަޒާ ޝަރުޠާ ފުށުއަރާ ގޮތަށް އެދުނު ގެއްލުމުގެ ބަދަލު ނަގައިނުދިނެވެ.

15 ދުވަހަށް ކްރެޑިޓަށް ނެގި ޑީސަލާއި ޕެޓްރޯލްގެ އަގު ދެއްކުމަށް އިސްތިއުނާފުކުރި ފަރާތުން ދޫކުރި ދެ ޗެކް ފައިސާ ނެތުމުން ބޭންކުން އަނބުރާ ރައްދުކުރުމުން، ތެޔޮ ވިއްކި ކުންފުނިން 555,250 ރުފިޔާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ފޯރުކޮށްދީފައިވަނީ 36,000 ލީޓަރު ތެޔޮ ކަމަށާއި، ތެޔޮ ލޯޑުކުރި އުޅަނދުތަކަކީ އޭނާގެ އުޅަނދުތަކެއް ނޫންކަމަށާއި، މިކަންކަން ދަށުކޯޓުން ނުބަލާ ނިންމިކަމަށެވެ.

ކްރެޑިޓަށް ނެގި ތެޔޮގެ އަގު ދެއްކުމަށް ދޫކުރި ޗެކްތައް އަނބުރާ ރައްދުވުމުން، ޗެކުގައިވާ ފައިސާ ހޯދުމަށް ކުރި ދަޢުވާގައި ތެޔޮ ޑެލިވަރީކުރެވުނު މިންވަރާއި ތެޔޮ ބަލައިގަތް އުޅަނދުތަކާ ބެހޭ އިޢުތިރާޟުތައް ބަލައިނުގަނެ ދަށުކޯޓުން ފައިސާ ދެއްކުމަށް ޙުކުމްކުރުން ޞައްޙަތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އޯޑަރު ފޯމުތަކާއި ޓެކްސް އިންވޮއިސްތަކުން ތެޔޮ ފޯރުކޮށްދިންކަން ސާބިތުވާތީއާއި، އުޅަނދުތަކަކީ އޯޑަރު ފޯމުގައިވާ އުޅަނދުތައް ކަމުންނާއި، ޝަކުލިއްޔާތު ފުރިހަމަ ޗެކަކީ ފައިސާ ދައްކަންޖެހޭކަމުގެ ހަރުދަނާ ހެއްކަކަށްވާތީ ދަށުކޯޓުގެ ޙުކުމަށް ތާއީދުކުރިއެވެ.