ޙުސަައިން ޝިނާން ވ. ޕްރޮސިކިއުޓަރ ޖެނެރަލް

އައްޑުއަތޮޅު ހިތަދޫ މެޖިސްޓްރޭޓް ކޯޓުން، ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކާވެދާނެކަމަށް ފެންނާތީ، 10 ދުވަހަށް ބަންދުގެ މުއްދަތު އިތުރުކުރިއެވެ.

މަސްތުވާތަކެތި ބޭނުންކޮށް އޭގެ ވިޔަފާރި ކުރިކަމުގެ ތުހުމަތުގައި ހައްޔަރުކުރި ފަރާތެއްގެ ބަންދުގެ މުއްދަތު ތަފާތު ފަހަރުމަތިން އިތުރުކުރަމުން އައިސް، މުއްދަތު ހަމަވުމުން އިތުރުކުރުމަށް ފުލުހުން މެޖިސްޓްރޭޓް ކޯޓަށް އެދުނެވެ. މުއްދަތުގެ މަޖިލީހުގެ މަޢުލޫމާތު ވަކީލަށް އެދުވަހު އެންގިއެވެ.

އިސްތިއުނާފުކުރި ފަރާތް ބުނީ، އޭނާ ޢައްޔަންކުރި ވަކީލަށް އެންގުމަކާނުލައި ކޯޓަށް ގެންގޮސް މުއްދަތު އިތުރުކުރީތީ އަމުރަކީ ޤާނޫނުއަސާސީގެ 48 (ށ) އާ ޚިލާފު އަމުރެއް ކަމަށެވެ. ވަކީލަށް އެންގިކަމަށް ދެފަރާތް އެއްބަސްވެ، ޚިލާފު އުފެދުނީ އެންގި ގަޑީގެ މައްޗަށެވެ.

މަސްތުވާތަކެތި ބޭނުންކޮށް އޭގެ ވިޔަފާރި ކުރިކަމުގެ ތުހުމަތުގައި ބަންދުގައި ހުރި މީހެއްގެ ބަންދުގެ މުއްދަތު އިތުރުކުރި އަމުރަކީ، އޭނާ ޢައްޔަންކުރި ވަކީލަށް މުއްދަތުގެ މަޖިލީހުގެ ގަޑި އެންގި ގޮތުގެ ސަބަބުން ޤާނޫނުއަސާސީގެ 48 ވަނަ މާއްދާގެ (ށ) އާ ޚިލާފު ބާޠިލު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

މަޖިލިސް ފެށުމުގެ ކުރިން ވަކީލަށް އަންގައި އެކަށީގެންވާ ވަގުތު ދެވިފައިވާކަން އެނގޭއިރު، ވަކީލު ނުލައި ކުރިއަށް ގެންދިއުމަށް ތުހުމަތުކުރެވޭ ފަރާތް އިންކާރުކުރިކަން ނޭނގޭތީ، އަމުރަކީ 48 (ށ) އާ ޚިލާފު ބާޠިލު އަމުރެއް ނޫނެވެ.