2017/HC-A/239

ފޭދޫ މެޖިސްޓްރޭޓް ކޯޓުން 17/2011 ގެ (ތަރުތީބުކުރުމުން) 107(ހ) ގެ ދަށުން ޑައިމޯފިނުން މުޢާމަލާތްކުރުމުގެ ކުށް ސާބިތުކޮށް 15 އަހަރުގެ ޖަލާއި 25,000 ރުފިޔާގެ ޖޫރިމަނާ ކުރިއެވެ.

ފުލުހުން ގެއަށް ގޮސް ބަލައިފާސްކުރިއިރު، ވަށާފާރު ނެތް ގޭގެ ފެންޑާގައި ބަހައްޓާފައިހުރި ތުހުމަތުކުރެވޭ ފަރާތުގެ ނަމުގައިވާ ސައިކަލުގެ މަޑިދަށުން ސިގިރޭޓު ފޮށްޓެއްގެ ތެރެއިން 3 ރަބަރު ޕެކެޓުގައި ޑައިމޯފިން ފެނުނެވެ. އޭނާގެ ކުޑަކަމުދާ ތަކެތި އޯޕިއޭޓްސް އާއި ބެންޒޯޑައިޒަޕައިންއަށް ޕޮޒިޓިވް ވިއެވެ.

އިސްތިއުނާފުކުރި ފަރާތުން ބުނީ ޙާލަތަކީ 188(ޏ) ގެ މުޢާމަލާތެއްގެ ތެރެއަށް ނުފެތޭ ކަމަށާއި، ދަޢުވާކުރި މާއްދާ ނޫން މާއްދާއަކުން ޙުކުމްކުރި ކަމަށާއި، ޤާނޫނު ނަންބަރު 17/2011 (މަސްތުވާތަކެއްޗާބެހޭ ޤާނޫނު) ގެ 146 ވަނަ މާއްދާއާއި ޤާނޫނުއަސާސީގެ 51(އ) އާ ޚިލާފު ކަމަށެވެ. ތަކެތި ލަނޑުދިނުމަށް ބަޔަކު ލީ ކަމަށް ބުންޏެވެ.

ވަށާފާރު ނެތް ގެއެއްގެ ފެންޑާގައި ބަހައްޓާފައިހުރި ސައިކަލެއްގެ މަޑިދަށުން ފެނުނު މަސްތުވާތަކެތި ސައިކަލުގެ ވެރިފަރާތަށް ނިސްބަތްކޮށް، ޑައިމޯފިނުން މުޢާމަލާތްކުރުމުގެ ކުށް ޝައްކެއްނެތް މިންވަރަށް ސާބިތުވޭތޯ.

ދަށުކޯޓުގެ ޙުކުމް ބާޠިލު

ސައިކަލު ހުރީ ކޮންމެ މީހަކަށްވެސް އަތްފޯރާ ތަނެއްގައި ކަމާއި، އިންކާރުކޮށް ލަނޑުދިނުމުގެ ތުހުމަތުކުރިއިރު ފިންގަރޕްރިންޓް ތަޙްލީލުކޮށްފައި ނުވާކަމާއި، ކުޑަކަމުދާ ތަކެތި ޕޮޒިޓިވްވުމަށް ބާރުލިއްބައިދޭ އިތުރު ހެއްކެއް ނެތުމުން، ޝައްކެއްނެތް މިންވަރަށް ކުށް ސާބިތުނުވާކަމަށް ހައިކޯޓުން ކަނޑައެޅިއެވެ.