2017/HC-A/179

ދަޢުވާކުރި ފަރާތް ކޯޓުގެ ހުއްދައާ ނުލައި ރަށުން ފުރައިގެން ގޮސް ޙާޟިރުނުވާތީ ޙާޟިރުކުރުމުގެ ޤަވާޢިދުގެ 18، 23 އަދި 29 ވަނަ މާއްދާގެ ދަށުން މައްސަލަ ބާޠިލުކުރުމާއެކު، އޭނާގެ ކުޑަކުދިންނަށް ދިރިއުޅޭނެ ތަނެއް ނެތުމުން ގެ ވިއްކުމުގެ މުޢާމަލާތް ކުރިއަށް ނުގެންދެވޭނެ ކަމަށްވެސް ކަނޑައެޅި.

ދަޢުވާކުރި ފަރާތުގެ މިލްކުގައިވާ ގެއާއި ގޯތި އެހެން ފަރާތަކަށް ވިއްކުމަށް އެދި މާލެއަތޮޅު ދިއްފުށީ މެޖިސްޓްރޭޓް ކޯޓަށް މައްސަލަ ހުށަހެޅި.

އެޑްރެސް ބަދަލުވެފައި ނުވާތީ ކޯޓަށް މީހުން ޙާޟިރުކުރުމުގައި ޢަމަލުކުރާނެ ގޮތުގެ ޤަވާޢިދުގެ 18 ވަނަ މާއްދާއާ ޚިލާފުވެފައި ނުވާކަމަށާއި، 23 ވަނަ މާއްދާއާ ޚިލާފުވުމަކީ ބާޠިލުކުރެވޭނެ ސަބަބެއް ނޫންކަމަށާއި، ގެ ވިއްކުމުގެ ނިންމުމުގައި ބައްލަވަންވާވަރަށް ނުބައްލަވާކަމަށާއި، ޚުލާޞާ ރިޕޯޓާއި ފައިނަލް ރިޕޯޓުގެ ޙުކުމުގައި ތަފާތު ހުރިކަމަށް އިސްތިއުނާފުކުރި ފަރާތުން ބުނެފައިވޭ.

ކޯޓުގެ ހުއްދައާ ނުލައި ރަށުން ފުރައިގެން ގޮސް ޙާޟިރުނުވުމުން ދަޢުވާކުރި ފަރާތުގެ މައްސަލަ ބާޠިލުކުރުން ޞައްޙަތޯ، އަދި ދަޢުވާކުރި ފަރާތުގެ ބަސް ނުހޯދައި މައްސަލައިގެ މައުޟޫޢަށް ގޮތެއް ނިންމުމާއި، ޚުލާޞާ ރިޕޯޓާ ތަފާތަށް ފައިނަލް ރިޕޯޓު ދޫކުރުން ޞައްޙަތޯ.

ބައެއް ބަދަލުކުރި: ދަޢުވާ ބާޠިލުކުރުމަށް ނިންމި ނިންމުން ޤާއިމްކޮށް، މައުޟޫޢަށް ނިންމި ނިންމުން ބާޠިލުކުރި؛ މައްސަލަ އަލުން ހުށަހަޅައިފިނަމަ ދަށު ކޯޓުން ބަލައި ފައިޞަލާކުރަން ޖެހޭ

ދަޢުވާކުރި ފަރާތް އެޑްރެސް ބަދަލުވި ވާހަކަ ނާންގައި، ހުއްދައާ ނުލައި ރަށުން ފުރައިގެން ގޮސް ޙާޟިރުނުވާތީ މައްސަލަ ބާޠިލުކުރުން ޞައްޙަ؛ ނަމަވެސް ފަރާތްތަކުގެ ބަސް ނުހޯދައި، ޝަރީޢަތް ނުހިންގައި މައުޟޫޢަށް ގޮތެއް ނިންމުމާއި، ޚުލާޞާ ރިޕޯޓާ ތަފާތަށް ފައިނަލް ރިޕޯޓުގައި ސަބަބުތައް އިތުރުކޮށް ޙުކުމް ބަދަލުކުރުން ޝަރުޢީ ޤާނޫނީ އުޞޫލުތަކާ ޚިލާފު.