2016/HC-A/497

ވެލިދޫ މެޖިސްޓްރޭޓް ކޯޓުން ތަރިކަ ދެ ބަޔަށް ބަހައި، ގޯތީގެ ޢިމާރާތްތަކާއި ނުއުފުލޭ މުދާ ދެ އަންހެން ދަރިންނަށް ހަމަހަމައަށް މިލްކުވާކަމަށް ޙުކުމްކޮށް، ފައިސާ ބެހުމަށް ކަނޑައެޅި.

މަރުޙޫމެއްގެ ނަމުގައިވާ ބަންޑާރަ ގޯތީގެ ޢިމާރާތްތަކާއި ނުއުފުލޭ މުދަލާއި ފައިސާ ވާރިޘުންގެ މެދުގައި ބަހައިދިނުމަށް އެދި އަންހެން ދަރިއަކު ހުށަހެޅި. އަނެއް ވާރިޘު ދިން ހިއްސާ ދެ އަންހެން ދަރިން ހަދިޔާއެއްގެ ގޮތުގައި ބަލައިގަތް. އިސްތިއުނާފުކުރި ވާރިޘު ބުނީ ގޯތީގެ ޢިމާރާތަކީ އޭނާގެ ފިރިމީހާ ކޮށްފައިވާ ޢިމާރާތެއް ކަމަށް.

އިސްތިއުނާފުކުރި ފަރާތުން ބުނީ ޢިމާރާތަކީ ފިރިމީހާ ކޮށްފައިވާ ޢިމާރާތެއްކަން ސާބިތުކުރުމަށް ހުށަހެޅި ދެ ހެކިންގެ ހެކިބަސް ނުނަގާކަމަށާއި، ހުށަހެޅި ބިލްތަކަށް ރިޢާޔަތްނުކުރާކަމަށާއި، އޭނާ ދިން ބަޔާންތައް ޝަރީޢަތް ނިމުނުގޮތުގެ ރިޕޯޓުގައި ނުހިމަނާކަމަށް.

ތަރިކަ ބެހުމުގައި، މަރުޙޫމުގެ ބަންޑާރަ ގޯތީގައިވާ ޢިމާރާތަކީ ވާރިޘެއްގެ ފިރިމީހާ ކޮށްފައިވާ ޢިމާރާތެއްކަން ސާބިތުކުރުމަށް ހުށަހެޅި ހެކިންގެ ހެކިބަސް ނުނަގައި ގޯއްޗާއި ނުއުފުލޭ މުދާ ތަރިކައިގެ ގޮތުގައި ހަމަހަމައަށް ބެހުމަކީ ޝަރުޢީ ޤާނޫނީ އުޞޫލުތަކާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ބިމާބެހޭ ޤާނޫނުގެ 40 ވަނަ މާއްދާގެ ދަށުން ބިމުގައިވާ ޢިމާރާތަކީ ބިމުގެ ވެރިފަރާތުގެ ތަކެތި ކަމާއި، ވެރިފަރާތުގެ އިޛުނަ ލިބިގެން ޢިމާރާތްކުރިކަން ލިޔުމުން ސާބިތުކުރަންޖެހޭއިރު އެފަދަ ލިޔުމެއް ނެތުމުން، ހެކިބަސް ނުނެގުމާއި ތަރިކަ ހަމަހަމައަށް ބެހުމަކީ ޚިލާފު ކަމެއް ނޫން ކަމަށް ކަނޑައެޅި.