މަރްޔަމް ޝަކީބާ ވ. އިބްރާހީމް ރަޝީދު

ފޭދޫ މެޖިސްޓްރޭޓް ކޯޓުން ބަންޑާރަ ގޯތީގެ ޢިމާރާތާއި ރުއްގަސް ފަދަ ތަކެތި މަރުވި މީހާއާއި އިސްތިއުނާފުކުރި ފަރާތުގެ މިލްކުވެރިކަމުގައި ހުރި ތަކެތިކަމަށް ކަނޑައަޅައި، ރަޖިސްޓްރީ ދެމީހުންގެ ނަމުގައި ހެދުމަށް އަމުރުކުރިއެވެ.

2001 ގައި ނިޔާވި މީހެއްގެ ތަރިކައެއްގެ ގޮތުގައި ސ. ފޭދޫގެ ގެއާއި ގޯތި 5 ވާރިޘުންގެ މެދުގައި ބަހަން ވާރިޘަކު ހުށަހެޅިއެވެ. އެ ގޯތި ޙަވާލުކުރެވިފައިވަނީ އަދި ގޭގެ ރަޖިސްޓްރީ އޮތީ އިސްތިއުނާފުކުރި (މަރުވި މީހާގެ ދަރި) ފަރާތުގެ ނަމުގައެވެ.

އެހެން މީހެއްގެ ނަމުގައިވާ ރަޖިސްޓްރީއެއްގެ މައްޗަށް ތަރިކައިގެ މައްސަލަ ކުރިއަށް ގެންދިޔުމާއި، ރަޖިސްޓްރީގެ ޞައްޙަކަން ބާޠިލުކުރުމާއި، ހެކި ވަޒަންނުކުރުމާއި، ޤާނޫނުއަސާސީގެ 40، 42 އަދި 56 ވަނަ މާއްދާތަކާ ޚިލާފުވުން އިސްތިއުނާފުކުރި ފަރާތުން ފާހަގަކޮށްފައިވެއެވެ.

އިސްތިއުނާފުކުރި ފަރާތުގެ ނަމުގައި ރަސްމީކޮށް ރަޖިސްޓްރީކުރެވިފައިވާ ގޯއްޗާއި ގެ، މަރުވެފައިވާ މީހެއްގެ ތަރިކައެއްގެ ގޮތުގައި ބަހަން ހުށަހަޅައި، ގޯތީގެ ޢިމާރާތްތައް އެ ދެމީހުންގެ ގޮޅިމިލްކެއްކަމަށް ކަނޑައެޅުން ޝަރުޢީ ޤާނޫނީ ހަމަތަކާ އެއްގޮތްތޯ.

ދަށުކޯޓުގެ ޙުކުމް ބާޠިލު

ގޯއްޗާއި ގެއަކީ އިސްތިއުނާފުކުރި ފަރާތުގެ ނަމުގައި ރަސްމީކޮށް ރަޖިސްޓްރީވެފައިވާ، އަދި ކޯޓުން މިލްކުވެރިކަން ސާބިތުކޮށްފައިވާ މުދަލަކަށްވާއިރު، އެ ލިޔުންތައް ނަފީކުރާ ލިޔުމެއް ހުށަހެޅިފައި ނުވާތީ، އެ މުދާ އިސްތިއުނާފުކުރި ފަރާތުގެ އެކަނި މިލްކެއްކަމަށް ބަލަންޖެހެއެވެ.