2016/HC-A/348

މައުޟޫޢީ ޢަދުލުވެރިކަން ޤާއިމުވެފައިވާތީ ވަޒީފާ އަނބުރާ ނުދެވޭނެކަމަށް ވަޒީފާއާބެހޭ ޓްރައިބިއުނަލުން (158/VTR/2014) ނިންމިއެވެ. ނަމަވެސް އިޖުރާއީ ޢަދުލުވެރިކަން ޤާއިމުނުކުރާތީ، ދެ މަހުގެ މުސާރައާއި ޢިނާޔަތް ބަދަލުގެ ގޮތުގައި ދިނުމަށް އަމުރުކުރިއެވެ.

އިސްތިއުނާފު ރައްދުވި ފަރާތަކީ މަހިބަދޫ މެޖިސްޓްރޭޓް ކޯޓުގައި ވޮޗަރެއްގެ ވަޒީފާ އަދާކުރި މުވައްޒަފެކެވެ. ނަޞޭޙަތްދީ، އިޞްލާޙުވުމަށް ފުރުޞަތުތައް ދީފައިވާއިރު، އިރުޝާދުތަކަށް ކިޔަމަންނުވުން ތަކުރާރުވެފައިވާތީ، ޝަރުޢީ ދާއިރާގެ މުވައްޒަފުންގެ ޤަވާޢިދުގެ ދަށުން އެ މުވައްޒަފު ނޯޓިހަކާނުލައި ވަޒީފާއިން ވަކިކުރިއެވެ.

އެޓަރނީ ޖެނެރަލް ބުނީ، 2013/HC-A/142 އާއި 2010/HC-A/208 ގައިވާ ގޮތަށް އިޖުރާއީ ޢަދުލުވެރިކަމުގެ އެންމެ ކުޑަ މިންވަރަށް ދައުލަތުން ޢަމަލުކުރިކަމަށެވެ. އަދި ބަދަލުގެ ޢަދަދަށް ވާޞިލުވި ގޮތް ބަޔާންނުކޮށް ޓްރައިބިއުނަލުން ބަދަލު ނަގައިދީފައިވާކަމަށްވެސް ބުންޏެވެ.

މުވައްޒަފު ވަޒީފާއިން ވަކިކުރުމުގައި ދައުލަތުން އިޖުރާއީ ޢަދުލުވެރިކަން ޤާއިމުކުރިތޯ؛ އަދި ވަޒީފާއާބެހޭ ޓްރައިބިއުނަލުން ދެ މަހުގެ މުސާރައާއި ޢިނާޔަތް ބަދަލުގެ ގޮތުގައި ކަނޑައެޅުމުގައި ބަދަލުގެ މިންވަރަށް ވާޞިލުވި ގޮތް ބަޔާންކުރަން ޖެހޭތޯ.

ބައެއް ބަދަލުކުރި؛ ބަދަލުގެ މިންވަރު އަލުން ބެލުމަށް ޓްރައިބިއުނަލަށް ފޮނުވި

ނޯޓިހެއް ނުދީ، ތުހުމަތުތައް އަންގައި ޖަވާބުދާރީވުމުގެ ފުރުޞަތު ނުދީ، އިދާރީ ތަޙްޤީޤެއް ނުކޮށް ވަކިކުރުމުން އިޖުރާއީ ޢަދުލުވެރިކަން ޤާއިމެއް ނުވެއެވެ. އެހެންކަމުން ޓްރައިބިއުނަލުގެ އެ ބައި ޤާއިމުކުރިއެވެ. ނަމަވެސް ބަދަލުގެ ޢަދަދަށް ވާޞިލުވީ ކޮން އުޞޫލަކުންކަން ސާފުނުވާތީ، އެ ބައި ބާޠިލުކޮށް އަލުން ބެލުމަށް ފޮނުވިއެވެ.