2015/HC-A/245

ވަޒީފާއާބެހޭ ޓްރައިބިއުނަލުން، ވަކިކުރެވޭނެ ޙާލަތެއްކަން ސާބިތުވާ މިންވަރަށް ހެކި ހުށަހަޅާފައިނުވާތީ ވަކިކުރުމަކީ ޤާނޫނާ ޚިލާފު ވަކިކުރުމެއްކަމަށް ކަނޑައަޅައި، މުވައްޒަފަށް ބަދަލެއް ދިނުމަށް އަމުރުކުރިއެވެ.

ރިސޯޓުގެ އެފް އެންޑް ބީ އެޓެންޑަންޓެއް، ގެސްޓަކު މަހަށް އެލާޖިކުވާކަން ބްރީފިންގގައި އަންގާފައިވާއިރު އެ ގެސްޓަށް މަހުގެ ސޫޕް ސަރވްކުރުމުން ގެސްޓުގެ ޙާލު ބޮޑުވެ ފަރުވާ ހޯދަންޖެހުނެވެ. އޭނާއަށް ޖަވާބުދާރީވުމަށް ފުރުޞަތު (ލެޓަރ އޮފް ޝޯ ކޯޒް) ދީ، އޭނާ ޖަވާބު ފޮނުވުމަށްފަހު ނޯޓިސް ނުދީ ވަޒީފާއިން ވަކިކުރެވުނެވެ.

ކުންފުނިން ބުނީ، ވަޒީފާއާބެހޭ ޤާނޫނުގެ ދަށުން ލިބިދޭ ބާރުގެ ތެރެއިން، މައުޟޫޢީ އަދި އިޖްރާއީ ޢަދުލުވެރިކަން ޤާއިމުކޮށް ވަކިކުރިކަމުގެ ހެކި ހުށަހެޅިކަމަށާއި، ނިންމުމުގައި ތަޠުބީޤުކުރި ހަމައަކީ "ބޮޑަށް ބުރަވެވޭ ގޮތެއްގެ މައްޗަށް" ކަމަށްވާއިރު ޓްރައިބިއުނަލުން އެކަމަށް ރިޢާޔަތް ނުކުރާކަމަށެވެ.

މަހަށް އެލާޖިކު ގެސްޓަކަށް މަހުގެ ސޫޕް ސަރވްކުރުމުގެ ހާދިސާއާ ގުޅިގެން ނޯޓިސް ނުދީ މުވައްޒަފަކު ވަޒީފާއިން ވަކިކުރުމަކީ ވަޒީފާއާބެހޭ ޤާނޫނުގެ ދަށުން މައުޟޫޢީ އަދި އިޖްރާއީ ޢަދުލުވެރިކަން ޤާއިމުކޮށް ކުރެވުނު ވަކިކުރުމެއްތޯ؛ އަދި ނޯޓިސް ނުދީ ވަކިކުރުމަށް ފުރިހަމަވާންޖެހޭ ޝަރުޠުތަކާއި ވަޒީފާދޭ ފަރާތުގެ ޒިންމާއަކީ ކޮބައިތޯ.

ވަޒީފާއާބެހޭ ޓްރައިބިއުނަލްގެ ނިންމުން ބާޠިލު

ގެސްޓެއްގެ ފުރާނައަށް ނުރައްކާތެރި ހާދިސާއެއް މުވައްޒަފުގެ އިހުމާލުން ހިނގުމަކީ ވަކިކުރުމަށް އެކަށީގެންވާ ސަބަބެއް ކަމުން މައުޟޫޢީ ޢަދުލުވެރިކަން ފުރިހަމަވެފައިވާކަމާއި، ބަޔާންތައް ނަގައި، ތުހުމަތު އަންގައި، ޖަވާބުދާރީވުމުގެ ފުރުޞަތު ދީފައިވާތީ އިޖްރާއީ ޢަދުލުވެރިކަން ޤާއިމުކުރުމަށްފަހު ވަކިކޮށްފައިވާތީ ޓްރައިބިއުނަލުގެ ނިންމުން ބާޠިލުކުރެވުނެވެ.