2016/HC-A/41

ސިވިލް ކޯޓުން ކަނޑައެޅީ ވަޒީފާއިން ވަކިކުރީ ވަޒީފާއާބެހޭ ޤާނޫނުގެ 21 ވަނަ މާއްދާއާ ޚިލާފަށް ކަމަށާއި، 41 މަހާއި 5 ދުވަހުގެ މުސާރަ ދީ، ވަޒީފާއަށް އަނބުރާ ބެހެއްޓުމަށެވެ.

ސީޕްލޭން ދުއްވާ ފަސްޓް އޮފިސަރެއްގެ ވަޒީފާއިން މުވައްޒަފު ވަކިކުރީ، އެކު މަސައްކަތްކުރި ފަރާތްތަކުން ޖިންސީ ގޯނާގެ ޝަކުވާ ހުށަހަޅައި ތަޙްޤީޤުކުރުމަށްފަހު، ވަޒީފާގެ އަޚުލާޤު އެކަށީގެންނުވާތީ ވަޒީފާއާބެހޭ ޤާނޫނުގެ 23 ވަނަ މާއްދާގެ ދަށުންނެވެ.

އިސްތިއުނާފުގައި ހުށަހެޅީ، ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 21 ވަނަ މާއްދާ ޞައްޙަ ގޮތަކަށް ތަޠުބީޤު ނުކުރާކަމަށާއި، ހެކި ވަޒަންކުރީ ހެއްކާބެހޭ ޤާނޫނުގެ 6 ވަނަ މާއްދާއާއި 2013/HC-A/132 އާ ޚިލާފަށް ކަމަށާއި، 2010/HC-A/208 އާއި 2014/HC-A/149 ގެ ޤާނޫނީ ހަމަތަކަށް ރިޢާޔަތް ނުކޮށް ޤާނޫނުއަސާސީގެ 143 (ރ) އާ ޚިލާފުވާ ކަމަށެވެ.

ވަޒީފާއިން ވަކިކުރުމުގައި ވަޒީފާއާބެހޭ ޤާނޫނުގެ 23 ވަނަ މާއްދާގައިވާ ޙާލަތެއް މެދުވެރިވެ، މައުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ޤާއިމުކުރެވިފައިވޭތޯ، އަދި ސިވިލް ކޯޓުން ހެކި ވަޒަންކުރުމާއި ވަޒީފާއާބެހޭ ޤާނޫނުގެ 21 ވަނަ މާއްދާ ތަޠުބީޤުކުރުމުގައި ޞައްޙަ ގޮތަކަށް ޢަމަލުކޮށްފައިވޭތޯ.

ދަށުކޯޓުގެ ޙުކުމް ބާޠިލު

މުވައްޒަފު ތަޙްޤީޤުގައި ދިން ބަޔާނުގައި ޝަކުވާގެ ބައެއް ކަންކަން ޤަބޫލުކޮށް މަޢާފަށް އެދިފައިވާތީ ބޮޑަށްބުރަވެވޭ މިންގަނޑަށް ތުހުމަތު ސާބިތުވާކަމަށާއި، މައުޟޫޢީ އަދި އިޖުރާއީ ޢަދުލުވެރިކަން ޤާއިމުވެފައިވާކަމަށާއި، މަޖުބޫރުކުރުމުގެ ދަޢުވާއަށް ޙުއްޖަތެއް ނެތްކަމަށް ކޯޓު ކަނޑައެޅިއެވެ.