2016/HC-A/294

ކްރިމިނަލް ކޯޓުން ހެކިންގެ ހެކިބަހުން ކުށް ސާބިތުވާކަމަށް ކަނޑައަޅައި، ޤާނޫނުއަސާސީގެ 59 (ހ) އަށް ރިޢާޔަތްކޮށް ޤާނޫނު ނަންބަރު 10/90 ގެ 6 (ށ) ގެ ދަށުން 10 އަހަރުގެ ޖަލު ޙުކުމެއް ކުރިއެވެ.

"މޭޑޭ" މުޒާހަރާގެ ކުރިން ދެމީހެއްގެ ގާތުގައި މުޒާހަރާގައި ކަމެއް ގޯސްވިޔަ ނުދިނުމަށް ބުނެ ދެ ފިސްތޯލައާއި ވަޒަން ދައްކައި ޓެރަރިޒަމްގެ ޢަމަލެއް ހިންގިކަމަށް ދައުލަތުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ހިޔާޒަތުން ހަތިޔާރެއް ނުފެނި ބަޔަކު ބުނާ ބުނުމެއްގެ މައްޗަށް ޙުކުމްކުރި ކަމަށާއި، ފިސްތޯލައެއްކަން ނުވަތަ ސިޔާސީ މަޤްޞަދުގައި ބިރުވެރިކަން އުފެއްދިކަން ސާބިތުނުވާ ކަމަށާއި، ހެކި ބަލައިގަތީ ޤާނޫނީ އުޞޫލުތަކާ ޚިލާފަށް ކަމަށާއި، ޤާނޫނުއަސާސީގެ 51 (ބ) ގެ ޙައްޤު ނުދޭ ކަމަށެވެ.

ޤާނޫނު ނަންބަރު 10/90 ގެ ދަށުން ޓެރަރިޒަމްގެ ކުށުން ކުށްވެރިކުރި ޙުކުމް ޞައްޙަތޯ: ހަތިޔާރު ހިޔާޒަތުން ނުފެނި ހެކިވެރިންގެ ބަސްމަތީގައި ކުށް ސާބިތުކުރެވޭތޯ، ޤާނޫނުއަސާސީގެ 51 (ބ) ގެ ޙައްޤު ލިބިދީފައިވޭތޯ އަދި ހެކި ބަލައިގަތީ ޤާނޫނީ އުޞޫލުތަކާ އެއްގޮތަށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

މުޠުލަޤު މަސްއޫލިއްޔަތުގެ ޤަޟިއްޔާތަކަކީ މަސްތުވާތަކެތީގެ މައްސަލަތަކެއް ކަމަށާއި، ހެކިންނާ ސުވާލުކުރުމާއި ޚުލާޞާ ބަޔާނަށް ފުރުޞަތު ދީފައިވާތީ 51 (ބ) ގެ ޙައްޤު ލިބިދީފައިވާކަމަށާއި، ހެކި ބަލައިގަތުމުގައި ޚިލާފުވި ޤާނޫނީ އުޞޫލެއް ބުނެދީފައިނުވާކަމަށާއި، ދައުލަތުގެ ތިން ހެކިންގެ ހެކިބަހުން ދަޢުވާގެ ސީޣާގައިވާ ކަންކަން ސާބިތުވާކަމަށް ކަނޑައެޅިއެވެ.