ޢަބްދުﷲ ސަޢީދު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ކުށް ސާބިތުކޮށް، ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 533 ވަނަ މާއްދާގެ (ނ) އާއި 1002 ވަނަ މާއްދާގެ (ހ) ގެ ދަށުން 4 މަހާއި 26 ދުވަހުގެ ޖަލު އަދަބު ކަނޑައެޅި.

ސުޕްރީމް ކޯޓުގެ ޖެމްސް ޚިދުމަތް ދައުލަތުގެ އިދާރާތަކުން ފޮނުވާ ލިޔުންތައް އެކްސެސް ނުވާގޮތަށް 2018 ފެބްރުއަރީގައި ކަނޑާލުމަށާއި ގުޅުމަށް މުވައްޒަފުންނަށް އެންގިކަމަށް ބުނެ، އޭރުގެ އުއްތަމަ ފަނޑިޔާރުގެ މައްޗަށް ޤާނޫނުލްޢުޤޫބާތުގެ 533 ވަނަ މާއްދާގެ ދަށުން ދައުލަތުގެ މަސައްކަތަށް ހުރަސްއެޅުމުގެ ދަޢުވާ ކުރި.

އިސްތިއުނާފުކުރި ފަރާތުން 13 ނުކުތާ ހުށަހެޅި، ފަނޑިޔާރުންގެ ޤާނޫނުގެ ޙިމާޔަތާއި ޙައްޤުތައް ނުދިނުމާއި، ފަނޑިޔާރު ބަދަލުވުމާއި، ލިޔުންތައް ސިއްރުކުރުމާއި، ސިއްރު ހެކިންގެ ހެކިބަސް ނެގި ގޮތާއި، ދަޢުވާ ފޯމާއި، ހެކި ޤާނޫނާ ޚިލާފުވުމާއި، ދިފާޢީ ހެކިން ހާޟިރުނުކުރުމާއި، ޢަމަލު ތަޖްރީމުކޮށްފައިނުވުމާއި ނިޔަތު ސާބިތުނުވުމަށް ބިނާކޮށް.

ސުޕްރީމް ކޯޓުގެ ޖެމްސް ޚިދުމަތް ކަނޑާލަން އެންގުމުން ޤާނޫނުލްޢުޤޫބާތުގެ 533 ވަނަ މާއްދާގެ ދަށުން ދައުލަތުގެ މަސައްކަތަށް ހުރަސްއެޅުމުގެ ކުށް ސާބިތުވޭތޯ؛ އަދި ފަނޑިޔާރުންގެ ޤާނޫނުގެ ޙިމާޔަތާއި، ފަނޑިޔާރު ބަދަލުވުމާއި، ހެކި ހާމަކުރުމާއި ސިއްރު ހެކިންގެ ހެކިބަހާއި، ދަޢުވާ ފޯމާއި، ދިފާޢީ ހެކިންނާބެހޭ އިޖުރާއީ ޙައްޤުތަކާ ޚިލާފަށް ޝަރީޢަތް ހިންގިތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޖެމްސް ކަނޑާލަން އެންގުމަކީ ފަނޑިޔާރުކަމުގެ ވާޖިބުގެ ތެރެއިން ކުރާ ކަމެއް ނޫން؛ ފަނޑިޔާރު ބަދަލުވީ ޝަރީޢަތް ފެށުމުގެ ކުރިން؛ ހެކި ސިއްރުކުރުމާއި ސިއްރު ހެކިންގެ ހެކިބަސް ނެގުމުގައި ޠަޢުނުކުރުމުގެ ފުރުޞަތު ލިބިފައި؛ ދަޢުވާ ފޯމު ޤާނޫނާ އެއްގޮތް؛ ކުށުގެ ޢަމަލުގައި ބައިވެރިވި ބައެއްގެ ހެކިބަސް ބޭނުންކުރުމަކީ ޤަބޫލުކުރެވިފައިވާ އުޞޫލެއް؛ ހެކިންގެ ހެކިބަހާއި ލޮގްތަކުން ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 533 ވަނަ މާއްދާގެ ޢުންޞުރުތައް ސާބިތުވާތީ ޙުކުމް ޤާއިމްކުރި.