2016/HC-A/198

ތަރިކައިގެ މުދަލަކީ އަޚުގެ ފިރިހެން ދަރި އިސްމާޢީލް އަޙްމަދަށް މިލްކުވާ މުދަލެއްކަމަށް ފެމިލީ ކޯޓުން ޙުކުމްކުރެއްވިއެވެ.

2014 ގައި ނިޔާވި އިސްމާޢީލް މުޙައްމަދުގެ މައިންބަފައިން، ކާފަމާމަ، އަނބި، ދަރިން ނުވަތަ ދަރިންގެ ދަރިން ދުނިޔޭގައި ނުތިބެއެވެ. އޭނާގެ ކުރިން ނިޔާވި އެއްބަނޑު އެއްބަފާ އަޚުގެ 3 އަންހެން ދަރިންނާއި 1 ފިރިހެން ދަރި ދުނިޔޭގައި ތިއްބެވެ. ތަރިކައިގައި ހިމެނެނީ ގޯތިއެއްގެ ބައެއްގައި ހުރި ޢިމާރާތްތަކާއި ވަޅުފަދަ ތަންތަނެވެ.

އިސްތިއުނާފުކުރި ތިން އަންހެން ދަރިން ބުނީ، އެމީހުން ވާރިސުންގެ ގޮތުގައި ނުބެލެވޭނެ ސަބަބު ޙުކުމުގައި ބަޔާންކޮށްފައި ނެތްކަމަށާއި، ހަތަރު މީހުންނަކީ ވާރިސުންކަން އިޢުތިރާފާއި ހެކިބަހުން ސާފުވާއިރު އެކަމަށް ރިޢާޔަތްކޮށްފައި ނުވާކަމަށެވެ.

މަރުޙޫމުގެ އެއްބަނޑު އެއްބަފާ އަޚެއްގެ (މަރުޙޫމުގެ ކުރިން ނިޔާވި) ދަރިންގެ ތެރެއިން ހަމައެކަނި ފިރިހެން ދަރިއަށް ތަރިކަ ލިބޭކަމަށް ފެމިލީ ކޯޓުން ކުރި ޙުކުމަކީ ޝަރުޢީ އުޞޫލާ އެއްގޮތް ޙުކުމެއްތޯ؛ އަޚުގެ އަންހެން ދަރިންނަކީ ވާރިސުންތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ސުންނަތު ޖަމާޢަތުގެ ތަރިކަ ބެހުމުގެ ޝަރުޢީ އުޞޫލުން މިޙާލަތުގައި ތަރިކަ ލިބޭނީ ހަމައެކަނި އަޚުގެ ފިރިހެން ދަރިއަށް ކަމުން، ދަށުކޯޓުގެ ޙުކުމަށް ބަދަލު ގެންނަންޖެހޭ ސަބަބެއް ނެތެވެ.