2017/HC-A/36

ސިވިލް ކޯޓުން ހެކިބަހުން އެއްބަސްވުމުގައި ސޮއިކުރިކަން ސާބިތުވާކަމަށް ކަނޑައަޅައި، 14 މަހުގެ ކުލި 420،000 ރުފިޔާ ދައްކައި ތަން ހުސްކޮށް ހަވާލުކުރަން ޙުކުމްކުރިއެވެ.

ގޯއްޗެއް 2009 ގައި 5 އަހަރަށް މަހަކު 30،000 ރުފިޔާއަށް ކުއްޔަށް ދީފައިވާއިރު، 2013 މެއި މަހުން ފެށިގެން ކުލި ނުދައްކާތީ، ގޯތީގެ ވެރިން (ނިޔާވި ބަފައިގެ ވާރިޘުން) ކުލީގެ އެއްބަސްވުން ބާޠިލްކޮށް ތަން ހުސްކޮށް ކުލި ދިނުމަށް ދަޢުވާކުރިއެވެ. ކުއްޔަށް ހިފި ފަރާތުން އެއްބަސްވުމުގައި ސޮއިކުރިކަމަށް އިންކާރުކުރިއެވެ.

އިސްތިއުނާފުކުރި ފަރާތުން ބުނީ ސޮއި ޔަޤީންނުކޮށް ޙުކުމްކުރިކަމަށާއި، ހެކިބަހުގައި ތަފާތު ހުރިކަމަށާއި، ޚަޞްމުންގެ އުޚްތެއްގެ ހެކިބަސް ބަލައިގަތްކަމަށާއި، ރަޖިސްޓްރީ ކުރުމުގެ ކުރިން ކުއްޔަށް ދިނުމުގެ ބާރު ނެތްކަމަށާއި، އެއްބަސްވުމަކީ ނާއިންސާފު އެއްބަސްވުމެއްކަމަށާއި، ޗެކްތަކަށް ރިޢާޔަތް ނުކުރިކަމަށާއި، ޗިޓް ނުފޮނުވާ ޙުކުމްކުރިކަމަށާއި، ނޯޓިސް ރައްދުނުކުރާކަމަށެވެ.

ކުލީގެ އެއްބަސްވުމުގައި ސޮއިކުރިކަމަށް ކުއްޔަށް ހިފި ފަރާތުން އިންކާރުކުރާއިރު ހެކިބަހުން އެކަން ސާބިތުވޭތޯއާއި، ރަޖިސްޓްރީ ނުކުރެވެނީސް ވާރިޘުން ކުރި ކުލީގެ އެއްބަސްވުން ޞައްޙަތޯއާއި، ކުލި ނުދައްކާތީ ފޮނުވި ނޯޓިސް ރައްދުވެފައިވޭތޯއާއި، ދަޢުވާލިބޭ ފަރާތް ޙާޟިރުނުވެ ޙުކުމްކުރުން ޤަވާޢިދާ ޚިލާފުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހެކިން ތިބި މަޖިލީހުގައި ސޮއިކުރިކަމާމެދު ޚިލާފެއް ނެތްކަމާއި، އުޚްތުގެ ހެކިބަސް އެހެން ހެކިބަހުން ކަށަވަރުވާކަމާއި، ތަރިކަ ލިބެނީ ނިޔާވިއިރު ތިބި ވާރިޘުންނަށްކަމުން ވާރިޘުންނަށް ކުއްޔަށް ދިނުމުގެ ބާރު ލިބޭކަމާއި، ކުލި ދައްކަމުން ދިއުމުން އެއްބަސްވުމަށް އެއްބަސްވިކަން ދޭހަވާކަމާއި، ރަޖިސްޓަރޑް ޕޯސްޓުން ފޮނުވި ނޯޓިސް ރައްދުވެފައިވާކަމާއި، ޙާޟިރުނުވުމުން ހެކީގެ މައްޗަށް ނިންމުމަކީ ޤަވާއިދާ އެއްގޮތްކަމެއްކަމަށް ކޯޓުން ނިންމިއެވެ.