2016/HC-A/184

ސިވިލް ކޯޓުން ކުލި ނުދައްކައި އެއްބަސްވުމާ ޚިލާފުވެއްޖެކަމަށް ކަނޑައަޅައި، އެއްބަސްވުން ނިމުމަކަށް ގެނެސް، 1 މަހުގެ ތެރޭގައި ތަން ހުސްކޮށް ޙަވާލުކުރުމަށާއި، ހުސްކުރުމާ ހަމައަށް މަހަކު 20,000 ރުފިޔާގެ މަގުން ކުލި ދެއްކުމަށް ޙުކުމްކުރިއެވެ.

އިމާރާތެއް ކުއްޔަށް ދިނުމަށް 2012 ގައި ވެފައިވާ އެއްބަސްވުމެއްގެ ދަށުން ނުދައްކާ ކުލި ހޯދުމަށް ކުރިން ކުރި ދަޢުވާއެއްގައި (1079/Cv-C/2014) ކުލި ދެއްކުމަށް ޙުކުމްކުރިއެވެ. އެ ޙުކުމް އިސްތިއުނާފުކޮށްފައިވަނިކޮށް، 2015 ސެޕްޓެމްބަރުން ފެށިގެން ކުލި ނުދައްކާތީ އެއްބަސްވުން ބާޠިލުކޮށް ތަން ހުސްކުރުމަށް ކުއްޔަށްދިން ފަރާތުން އާ ދަޢުވާއެއް ކުރިއެވެ.

އިސްތިއުނާފުކުރި ފަރާތުން ބުނީ، ކުރީގެ ޤަޟިއްޔާގެ އިސްތިއުނާފު ނިމުމުގެ ކުރިން އެއްބަސްވުން ބާޠިލުކަމަށް ނިންމުމަކީ މަތީ މަރުޙަލާއެއްގައިވާ މައްސަލައެއްގެ ބާރު ކެނޑޭގޮތަށް ނިންމުމެއް ކަމަށެވެ.

ހަމަ އެ ކުލީގެ އެއްބަސްވުމާ ގުޅޭ ކުރީގެ ޤަޟިއްޔާއެއްގެ އިސްތިއުނާފު ހައިކޯޓުގައި ހިނގަމުން ދަނިކޮށް، އޭގެ ފަހުން ނުދައްކާ ކުލީގެ ސަބަބުން އެއްބަސްވުން ބާޠިލުކޮށް ތަން ހުސްކުރުމަށް ސިވިލް ކޯޓުން ނިންމުމަކީ މަތީ މަރުޙަލާއެއްގައިވާ މައްސަލައެއްގެ ބާރު ކެނޑޭގޮތަށް ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުރީގެ އިސްތިއުނާފުގައި ފާހަގަކުރީ މަރާމާތުގެ ޚަރަދު ކުލިން އުނިކުރުމުގެ މައްސަލަ ކަމަށާއި، ކުލި ދައްކަންޖެހޭ ނިންމުމަށް އަސަރުކުރާ ކަމެއް ނޫން ކަމަށާއި، ހައިކޯޓުން މައްސަލަ ހުއްޓުމަށް އަމުރެއް ނުކުރާ ކަމަށާއި، ދެ މައްސަލައިގެ މައުޟޫއަށް ސީދާ ގުޅުމެއް ނެތް ކަމަށެވެ. 2015/HC-A/365 ގެ ޙުކުމުން ދަށުކޯޓުގެ ޙުކުމަށް ބަދަލުގެންނަންޖެހޭ ސަބަބެއްވެސް ނުފެނެއެވެ.