2016/HC-A/09

އިތުރު ޚަރަދާއި ގެއްލުމާއި ވަކީލުގެ ފީ ނަގައިނުދީ، އެޑްވާންސްގެ ގޮތުގައި ދީފައިވާ US$66,658 ދިނުމަށާއި އެއްބަސްވުން ބާޠިލްވެފައިވާކަމަށް ސިވިލް ކޯޓުން ޙުކުމްކުރިއެވެ.

ގުޑް ޓްރެވަލް އޮފް މޯލްޑިވްސް ޕްރައިވެޓް ލިމިޓެޑުގެ ސަފާރީ އުޅަނދު 14 އޮކްޓޯބަރު 2010 އިން 09 މެއި 2011 އަށް އެމިސްޑެސް މޯލްޑިވްސް ޕްރައިވެޓް ލިމިޓެޑަށް ކުއްޔަށް ދިނުމަށް އެއްބަސްވެ، ކުއްޔަށް ހިފި ފަރާތުން އެޑްވާންސް ދިނެވެ. ތާރީޚުގައި އުޅަނދު ޙަވާލުނުކުރުމުން އެޑްވާންސް، އިތުރު ޚަރަދު، ގެއްލުމާއި ވަކީލުގެ ފީ ހޯދުމަށާއި އެއްބަސްވުން ބާޠިލްވެފައިވާކަމަށް ކަނޑައެޅުމަށް ކުއްޔަށް ހިފި ފަރާތުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ތާރީޚަށް ބޯޓު ނިމިފައިވާއިރު ޙަވާލުވުން ފަސްކުރީ ކުއްޔަށް ހިފި ފަރާތުން އެދުނު އިތުރު މަސައްކަތްތައް ނިމެންދެން ކަމަށާއި، ބޯޓުން ތަކެތި ގެންދިޔަކަން ސާބިތުކުރުމަށް ހެކިން ޙާޟިރުކުރަން އެދުނު ނަމަވެސް ޙާޟިރުނުކޮށް ގޮތެއް ނިންމާފައި ނުވާކަމަށެވެ.

ސަފާރީ އުޅަނދެއް ކުއްޔަށް ދިނުމުގެ އެއްބަސްވުމުގައިވާ ތާރީޚުގައި އުޅަނދު ޙަވާލުނުކުރުމުން ދީފައިވާ އެޑްވާންސް ފައިސާ އަނބުރާ ދޭންޖެހޭކަމަށް ސިވިލް ކޯޓުން ނިންމުމާއި، ދަޢުވާއާ ގުޅުމެއްނެތް ކަމަކަށް ހެކިން ޙާޟިރުނުކުރުމަކީ ޝަރުޢީ ނުވަތަ ޤާނޫނީ އުޞޫލަކާ ޚިލާފުވުމެއްތޯ.

އިސްތިއުނާފު ބަލައިނުގަނެ، ދަށުކޯޓުގެ ޙުކުމް ޤާއިމް

ޙަވާލުކުރިކަން ސާބިތުކޮށްދީފައި ނުވާއިރު، ޙަވާލުނުކުރެވުނީ އުޅަނދު ތައްޔާރުނުވެގެންކަން ލިޔުންތަކާއި ހެކިބަހުން އެނގެއެވެ. އެޑްވާންސް ލިބުނުކަމަށް އިންކާރުކޮށްފައި ނުވެއެވެ. ތަކެތި ގެންދިޔަކަމަކީ މައްސަލައިގެ މައުޟޫޢާ ގުޅުމެއްނެތް ކަމަކަށްވާތީ ހެކިން ޙާޟިރުނުކުރުމަކީ ޚިލާފުވުމެއް ނޫނެވެ.