2016/HC-A/362

ސިވިލް ކޯޓުން، ފައިސާއަކީ ތަބައްރުޢެއްގެ ގޮތުން ދިން ފައިސާއެއްކަން ސާބިތުކުރުމުގެ ބުރަ އޮތީ ފައިސާ ލިބުނުކަން ޤަބޫލުކުރާ ފަރާތްތަކުގެ މައްޗަށް ކަމަށް ކަނޑައަޅައި، ފައިސާއާއި ޓްރާންސްފަރ ޚަރަދު އަނބުރާ ދިނުމަށް ޙުކުމްކުރިއެވެ.

ބިދޭސީ ފަރާތަކުން، ކައިވެނިކުރާނެ ކަމަށް ބުނެ އޮޅުވާލައިގެން ހޯދި ފައިސާގެ ތެރެއިން ފުރަތަމަ އިސްތިއުނާފުކުރި ފަރާތުގެ އެދުމަށް ދެވަނަ އިސްތިއުނާފުކުރި ފަރާތުގެ އެކައުންޓަށް ޓްރާންސްފަރކުރި ފައިސާއާއި ޓްރާންސްފަރ ޚަރަދު އަނބުރާ ހޯދުމަށް ދަޢުވާކުރިއެވެ. ފައިސާ ލިބުނުކަން ޤަބޫލުކުރި ނަމަވެސް، އެއީ އެދިގެން ދިން ފައިސާއެއް ނޫން ކަމަށް ދަޢުވާ ލިބުނު ފަރާތްތަކުން ބުންޏެވެ.

އިސްތިއުނާފުކުރި ފަރާތްތަކުން ބުނީ މަދަނީ މައްސަލަތަކުގައި ސާބިތުކުރުމުގެ ބުރަ އޮންނަނީ ދަޢުވާކުރާ ފަރާތުގެ މައްޗަށް ކަމަށް 2010/SC-A/02 ޤަޟިއްޔާގައި ކަނޑައަޅާފައިވާ އުޞޫލާ ޚިލާފަށް ނިންމި ކަމަށާއި، ހެއްކާބެހޭ ޤާނޫނުގެ 5 ވަނަ މާއްދާއާ ޚިލާފުވި ކަމަށެވެ.

ދަޢުވާކުރާ ފަރާތުން ފޮނުވި ފައިސާ ލިބުނުކަން ޤަބޫލުކުރާ ފަރާތްތަކުން، އެއީ ތަބައްރުޢެއްގެ ގޮތުން ލިބުނު ފައިސާއެއް ކަމަށް ބުނާއިރު، ޘާބިތުކުރުމުގެ ބުރަ އުފުލަންޖެހޭނީ ކޮން ފަރާތަކުންތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފައިސާ ފޮނުވާފައިވަނީ ފުރަތަމަ އިސްތިއުނާފުކުރި ފަރާތުގެ އެނގުމާއި ފެނުމުގެ ތެރެއިން، އެކި ތާރީޚުތަކުގައި އެކި ފަހަރުމަތިން ކަމުން ދެވަނަ ފަރާތަށްވެސް އެނގިގެންކަމާއި، ޞައްޙަ މުޢާމަލާތެއް ނުވަތަ ތަބައްރުޢެއްކަން ސާބިތުކުރުމުގެ ބުރަ އޮތީ އެ ފަރާތްތަކުގެ މައްޗަށް ކަމުން، އެކަން ސާބިތުނުކުރެވޭތީ ޙުކުމް ޤާއިމުކުރިއެވެ.