2015/HC-A/341

ދަޢުވާ ސާބިތުނުވާކަމަށް ކަނޑައަޅައި، ދެފަރާތުގެ ދެމެދުގައިވާ އެއްބަސްވުމާއި އެއްގޮތަށް އިލްތިޒާމުތައް އަދާކުރުމަށް ދެފަރާތަށް އަންގައި ސިވިލް ކޯޓުން ޙުކުމްކުރިއެވެ.

ފައިބަރު މަސްދޯންޏެއް ވިއްކުމަށް ވެވުނު އެއްބަސްވުމާ ގަންނަ ފަރާތް ޚިލާފުވެފައިވާތީ، އެއްބަސްވުން ބާޠިލްކޮށް ދޯނި ވިއްކާ ފަރާތްތަކާ ޙަވާލުކުރުމަށާއި ޤާނޫނީ ޚަރަދު ހޯދައިދިނުމަށް އެދި ވިއްކި ފަރާތްތަކުން ދަޢުވާކުރި މައްސަލައެކެވެ. ދެފަރާތުން ހުށަހެޅީ ދެ އެއްބަސްވުމުގެ ކޮޕީ ކަމަށާއި، އެ ދެ ލިޔުމުގައި އަގާއި އަގު ދައްކާނެ ގޮތުގައި ބޮޑެތި ތަފާތުތަކެއް ހުރިކަމަށް ފާހަގަކުރެވުނެވެ.

އިސްތިއުނާފުކުރި ފަރާތްތަކުން ބުނީ ލިޔުމުން ވެފައިވާ އެއްބަސްވުމަށާއި، ދެ އެއްބަސްވުމުގެ ތަފާތުތަކަށް ރިޢާޔަތް ނުކޮށް، އަދި އެދުނު ހެކިން ޙާޟިރު ނުކޮށް މައްސަލަ ނިންމާފައިވާ ކަމަށެވެ.

ދޯނި ވިއްކުމުގެ އެއްބަސްވުމެއްގެ ޞައްޙަކަމަށް އިންކާރުކޮށް، އެއްބަސްވުމުގެ އަޞްލު ހުށަހެޅިފައިނުވާ ޙާލަތެއްގައި، ހެކިންގެ ހެކިބަސް ނުނަގާ، ފިންގަރޕްރިންޓް ކަށަވަރު ނުކޮށް، ހުށަހެޅުނު ލިޔުންތަކަށް ރިޢާޔަތް ނުކޮށް ދަޢުވާ ސާބިތުނުވާކަމަށް ސިވިލް ކޯޓުން ކުރި ޙުކުމަކީ ޝަރުޢީ އަދި ޤާނޫނީ އުޞޫލުތަކާ އެއްގޮތަށް ކުރެވިފައިވާ ޙުކުމެއްތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ސިވިލް ކޯޓަށް ފޮނުވި

އެއްބަސްވުމުގެ ޞައްޙަކަމަށް އިންކާރުކޮށްފައިވާއިރު ހެކިންގެ ހެކިބަސް ނަގައި ފިންގަރޕްރިންޓް ކަށަވަރުކުރުމަށް އެދިފައިވީނަމަވެސް އެކަން ނުކޮށް، ހުށަހެޅުނު ޗެކް ޓްރާންސްފަރ ސްލިޕްތަކާއި މެސެޖްތަކަށް ރިޢާޔަތް ނުކޮށް، މައުޟޫޢީގޮތުން ގޮތެއް ނުކަނޑައަޅާ ޙުކުމްކޮށްފައިވާތީ ޙުކުމް ބާޠިލުކޮށް، އެއްބަސްވުމުގެ ޞައްޙަކަމާއި އެއާ އެއްގޮތަށް ޢަމަލުކޮށްފައިވޭތޯ ކަނޑައެޅުމަށް މައްސަލަ ތަޙުވީލުކުރިއެވެ.