މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ ވ. އިސްމާޢީލް ޝުޖާޢު

ސިވިލް ކޯޓުން، ހުސްކުރަން އެންގި އެންގުމާއި އެހެން ފަރާތަކާ ވެފައިވާ އެއްބަސްވުން ބާޠިލުކޮށް، ކުރީގެ އެއްބަސްވުން ދެމިއޮތްކަމަށާއި ޙައްޤުތައް 15 ދުވަހުގެ ތެރޭގައި އިސްތިއުނާފު ރައްދުވާ ފަރާތަށް ބަދަލުކޮށްދިނުމަށް ދައުލަތަށް އަންގައި ޙުކުމްކުރިއެވެ.

ކުރީގެ މާލޭ ސިޓީ ކައުންސިލުން ކުއްޔަށް ދީފައިވާ ކާނިވާ ސަރަޙައްދުގެ ސްޓޯލެއްގެ ޙައްޤުތައް ކުއްޔަށް ހިފި ފަރާތުން އިސްތިއުނާފު ރައްދުވާ ފަރާތަށް ބަދަލުކުރުމަށް ކައުންސިލަށް ހުށަހަޅައި އިޤުރާރެއް ވެފައިވަނިކޮށް، ބިންތައް ހައުސިންގ މިނިސްޓްރީއަށް ބަދަލުވުމުން މިނިސްޓްރީން ސްޓޯލް ހުސްކުރަން އަންގައި އެހެން ކުންފުންޏަކަށް ވަގުތީ ގޮތުން ކުއްޔަށް ދިނެވެ.

ދައުލަތުން ބުނީ ޕްރިވިޓީ އޮފް ކޮންޓްރެކްޓްގެ ދަށުން ރައްދުވާ ފަރާތަށް ދަޢުވާކުރުމުގެ ޙައްޤެއް ނެތްކަމަށާއި، އިޢުލާނަށް ޖަވާބު ނުދީ މުޢާމަލާތް ހުށަނާޅާތީ ދަށުކޯޓު ނިންމުން ނުބައިކަމަށާއި، bona fide purchaser ގެ އުޞޫލާ ޚިލާފުކަމަށެވެ. ރައްދުވާ ފަރާތުން ބުނީ އެއްބަސްވުމުގެ ޝަރުޠާއި އިޤުރާރާއި ކައުންސިލް ނިންމުމުން ޙައްޤު ލިބިފައިވާކަމަށެވެ.

ކުއްޔަށް ދީފައިވާ ބިމެއްގެ އެއްބަސްވުމުގެ ބައިވެރިއަކަށް ނުވާ ތިންވަނަ ފަރާތަކަށް، އެ އެއްބަސްވުމުގެ ދަށުން ކުއްޔަށް ހިފި ފަރާތަށް ލިބިފައިވާ ޙައްޤުތައް ބަދަލުކުރުމާއި ދައުލަތުގެ އެންގުން ބާޠިލުކުރުމަށް ދަޢުވާކުރުމުގެ ޤާނޫނީ ޙައިސިއްޔަތު (Locus standi) ލިބިގެންވޭތޯ؛ އަދި ހަމައެކަނި ޙައްޤުތައް ބަދަލުކުރުމަށް އެދުމަކާއި އިޤުރާރަކުން ޕްރިވިޓީ އޮފް ކޮންޓްރެކްޓްގެ އުޞޫލުން އިސްތިސްނާވޭތޯ.

ދަށުކޯޓުގެ ޙުކުމް ބާޠިލު

ޙައްޤުތައް ބަދަލުކުރުމަށް ލިޔުމުން އެއްބަސްވުމެއް ކައުންސިލާއި ރައްދުވާ ފަރާތާ ދެމެދު ނުވާތީ، ބަދަލުކުރުމަށް އެދުމަކާއި އިޤުރާރަކުން ޙައްޤުތައް ނަޤުލުނުވާތީ، ރައްދުވާ ފަރާތަށް ދަޢުވާކުރުމުގެ ޙައިސިއްޔަތު ނެތެވެ. އެހެންކަމުން ދަށުކޯޓުގެ ނިންމުން އިޖުރާއީ ގޮތުން ސައްޙަނޫނެވެ.