އާމިނަތު ނާއިޝާ މުޙައްމަދު ވ. ސިމްފަނީ މޯލްޑިވްސް ޕވޓ ލޓޑ

ވަޒީފާއާބެހޭ ޓްރައިބިއުނަލުން ވަކިކޮށްފައިވަނީ އެކަށީގެންވާ ސަބަބެއް އޮވެގެން ނޫންކަމަށް ކަނޑައަޅައި، ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 29 ވަނަ މާއްދާގެ ދަށުން 3 މަހުގެ މުސާރަ (60,000 ރ) އާއި އަހަރީ ޗުއްޓީއަށް 20,000 ރ، ޖުމްލަ 80,000 ރ ނަގައިދިނުމަށް ނިންމައި، އެހެން އެދުންތައް ބާޠިލުކުރިއެވެ.

ސިމްފަނީ މޯލްޑިވްސްގައި ހިއުމަން ރިސޯސް މެނޭޖަރުގެ މަޤާމުގައި 2 އަހަރުގެ އެއްބަސްވުމެއްގެ ދަށުން ހުރި މުވައްޒަފަކު 11 އޮކްޓޯބަރ 2016 ގައި ވަޒީފާއިން ވަކިކުރުމުން، ބާކީ މުއްދަތުގެ މުސާރަ، ސަރވިސް ޗާޖު، އޯވަރޓައިމް، ޗުއްޓީގެ ފައިސާ، ޕެންޝަން ފައިސާ ފަދަ ކަންކަން ހޯދުމަށް ޓްރައިބިއުނަލަށް ހުށަހެޅި މައްސަލައެކެވެ.

އިސްތިއުނާފުކުރި މުވައްޒަފު ބުނީ: ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 51 ވަނަ މާއްދާއިން އިސް މަޤާމުތައް ސަރވިސް ޗާޖުން އިސްތިސްނާ ނުކުރާކަމަށާއި، ޕެންޝަން ފައިސާއަށް އަމުރު ނުކުރުން ގޯސްކަމަށާއި، 2015/HC-A/228 ގެ އުޞޫލުން ބާކީ މުއްދަތުގެ މުސާރަ ލިބެންޖެހޭކަމަށެވެ.

ހިއުމަން ރިސޯސް މެނޭޖަރަކަށް ސަރވިސް ޗާޖު ލިބެންޖެހޭތޯއާއި، ޤާނޫނާ ޚިލާފަށް ވަޒީފާއިން ވަކިކުރުމުން ވަކި މުއްދަތެއްގެ އެއްބަސްވުމުގެ ބާކީ މުއްދަތުގެ މުސާރައާއި ޢިނާޔަތްތައް ބަދަލުގެ ގޮތުގައި ލިބެންޖެހޭތޯއާއި، ޓްރައިބިއުނަލުން ކަނޑައެޅި ބަދަލުގެ މިންވަރު ޞައްޙަތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ސަރވިސް ޗާޖު ބަހަނީ ކަސްޓަމަރުންނަށް ޚިދުމަތްދޭ ވިޔަފާރިތަކުގެ މުވައްޒަފުންނަށް ކަމުން ހިއުމަން ރިސޯސް މެނޭޖަރަކަށް ނުލިބޭނެއެވެ؛ ޕެންޝަން ފައިސާ މިހާރު ޖަމާކޮށްފައިވާތީ ނުބެލެއެވެ؛ ބަދަލުގެ މިންވަރު 29 (ރ) އާއި 2013/HC-A/142 ގައިވާ ކަންކަމަށް ރިޢާޔަތްކޮށް ކަނޑައަޅާފައިވާތީ ބަދަލު ނުގެނެވެއެވެ.