އައިމަން ޢަބްދުއްސައްތާރު ވ. ޕްރޮސިކިއުޓަރ ޖެނެރަލްގެ އޮފީސް

ކްރިމިނަލް ކޯޓުން، މުޖުތަމަޢުގެ ސަލާމަތާއި ރައްކާތެރިކަމަށްޓަކައި ކަމަށް ބަޔާންކޮށް، 26 އޮކްޓޯބަރު 2016 އިން ފެށިގެން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ތުހުމަތުކުރެވޭ ފަރާތް ބަންދުކޮށްފައި ބެހެއްޓުމަށް އަމުރުކުރި.

ފޯޖްކޮށްފައިވާ ލިޔުންތަކެއް އިމިގްރޭޝަން އޮންލައިން ސިސްޓަމަށް ހުށަހަޅައިގެން ބިދޭސީން ގެނައުމުގެ ތުހުމަތުގައި ފުލުހުން ބަންދުގެ މުއްދަތު އިތުރުކުރަން އެދުނު މައްސަލައެކެވެ.

އިސްތިއުނާފުކުރި ފަރާތުން ބުނީ ހައްޔަރުކުރުމުގެ ޟަރޫރަތަށް ރިޢާޔަތްނުކޮށް 2010/SC-A/19 ގެ އުޞޫލުތަކާއި ޤާނޫނުއަސާސީގެ 16، 21، 49 އަދި 51 (އ) ވަނަ މާއްދާތަކާ ޚިލާފަށް އަމުރު ނެރެފައިވާ ކަމަށެވެ. ދައުލަތުން ބުނީ މުޖުތަމަޢުގެ ސަލާމަތުގެ ސަބަބު ބަންދުގެ މަޖިލީހުގައި ފުލުހުން ފާހަގަކޮށްފައިވާނެ ކަމަށެވެ.

ފޯޖަރީގެ ތުހުމަތުގައި ތުހުމަތުކުރެވޭ ފަރާތް މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް ކްރިމިނަލް ކޯޓުން ނެރުނު އަމުރު، ބަންދުގެ ޟަރޫރަތަށް ރިޢާޔަތްނުކޮށް ނެރުނު، ޤާނޫނުއަސާސީއާއި ސުޕްރީމް ކޯޓުގެ 2010/SC-A/19 ގެ އުޞޫލުތަކާ ޚިލާފު އަމުރެއްތޯ.

އިސްތިއުނާފު ބާޠިލް، ކްރިމިނަލް ކޯޓުގެ ކޯޓު އަމުރު ޤާއިމް

މުޖުތަމަޢުގެ ސަލާމަތަކީ ބަންދަށް ޖާއިޒު ސަބަބެއްކަމާއި، ކުށުގެ ޒާތާއި ބާވަތާއި ކުޑަބޮޑު މިނާއި ތަޙުޤީޤުގެ ދަތިތަކަށް ބަލާއިރު ދޫކޮށްލުމަކީ މުޖުތަމަޢުގެ ސަލާމަތަށް ނުރައްކަލެއް މެދުވެރިވެދާނެ ކަމެއްކަމަށް ކަނޑައަޅައި އަމުރު ޤާއިމުކުރި.