2017/HC-A/115

"މުޖުތަމަޢުގެ ސަލާމަތަށް" ބަލައި ތުހުމަތުކުރެވޭ ފަރާތް ގޭބަންދުގައި ބަހައްޓަން ކްރިމިނަލް ކޯޓުން (145-J/MD/2017/940) އަމުރުކުރިއެވެ.

މަސްތުވާތަކެތި ގެންގުޅޭކަމަށް ޝައްކުކުރެވިގެން ހުއްޓުވައި ހަށިގަނޑު ބަލާފާސްކުރުމުން މަސްތުވާތަކެތިކަމަށް ޝައްކުކުރެވޭ ތަކެތި ހުރި ރަބަރު ޕެކެޓްތަކާއި ސެލޯފިންކޮޅެއް ފެނި، ގިނަ އަދަދެއްގެ ފައިސާ ފެނި، ކުޑަކަމުދާ ތަކެތި ކެނަބިސްއަށް ޕޮޒިޓިވްވިއެވެ. ކުށް ތަކުރާރުވެ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެތީ ހޯމް މިނިސްޓްރީން ކަނޑައަޅާ ތަނެއްގައި ބަންދުކުރަން ފުލުހުން އެދުނެވެ.

އަމުރަކީ ޤާނޫނުއަސާސީގެ 49 ވަނަ މާއްދާއާއި ބަންދާބެހޭ ޤަވާޢިދުގެ 7 ވަނަ މާއްދާއާ ޚިލާފު، އަދި 143 (ރ) ގެ ދަށުން ތަބާވާންޖެހޭ ސުޕްރީމް ކޯޓުގެ ސާބިޤާތަކަށް ރިޢާޔަތްނުކޮށް ނެރުނު އަމުރެއްކަމަށް ޕްރޮސިކިއުޓަރ ޖެނެރަލްގެ އޮފީހުން ބުނެއެވެ.

މަސްތުވާތަކެތި ބޭނުންކޮށް ގެންގުޅެ ޓްރެފިކްކުރުމުގެ ތުހުމަތުގައިވާ ފަރާތެއް މުޖުތަމަޢުގެ ސަލާމަތަށްޓަކައި ގޭބަންދުގައި ބަހައްޓަން ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ބަންދާބެހޭ ޤަވާޢިދުގެ 7 ވަނަ މާއްދާއާއި ސުޕްރީމް ކޯޓުގެ ސާބިޤާތަކާ އެއްގޮތް އަމުރެއްތޯ، ނުވަތަ ހޯމް މިނިސްޓްރީން ކަނޑައަޅާ ތަނެއްގައި ބަންދުކުރަންޖެހޭތޯ.

ކްރިމިނަލް ކޯޓުގެ ގޭބަންދުގެ އަމުރު ބާޠިލު؛ 15 ދުވަހަށް ހޯމް މިނިސްޓްރީން ކަނޑައަޅާ ތަނެއްގައި ބަންދުކުރުމަށް އަމުރުކުރި

ތުހުމަތެއް އުފެދޭ މިންވަރުގެ ހެކި ޤަރީނާ ފުލުހުން ހުށަހަޅާފައިވާއިރު، މަސްތުވާތަކެތީގެ ކުށްތަކަކީ މުޖުތަމަޢަށް ނުރައްކާތެރިކަން ބޮޑު ކުށްތަކެއްކަމަށް ސުޕްރީމް ކޯޓުން ކަނޑައަޅާފައިވާތީ، ދޫވެފައި ހުރުމަކީ ނުވަތަ ގޭބަންދުގައި ހުރުމަކީވެސް މުޖުތަމަޢުގެ ސަލާމަތަށް ނުރައްކަލެކެވެ.