2017/HC-A/286

"މުޖުތަމަޢުގެ ސަލާމަތަށްޓަކައި" ތުހުމަތުކުރެވޭ ފަރާތް ގޭބަންދުގައި ބަހައްޓަން ކްރިމިނަލް ކޯޓުން އަމުރުކުރިއެވެ.

ކްރިމިނަލް ކޯޓުގެ އަމުރެއްގެ ދަށުން އޮފީހެއް ބަލާފާސްކުރުމުން އައި.އީ.ޑީ އެއް ތައްޔާރުކުރުމަށް ބޭނުންވާ ތަކެއްޗާއި ކެމިކަލް ފެނި، އައި.އީ.ޑީ ހަދައި ގޮއްވާލަން ރާވާކަމަށް ތުހުމަތުކުރެވޭ މައްސަލައިގައި ބައިވެރިވިކަމުގެ ތުހުމަތު ކުރެވުނު ފަރާތެއް ހޯމް މިނިސްޓްރީން ކަނޑައަޅާ ތަނެއްގައި ބަންދުކުރަން ފުލުހުން އެދުނެވެ. ހައިކޯޓުގައި އަޑުއެހުން ފެށުމުގެ ކުރިން މިމައްސަލާގައި ދަޢުވާކުރުމަށް ކްރިމިނަލް ކޯޓަށް ފޮނުވިއެވެ.

އަމުރަކީ ޤާނޫނުއަސާސީގެ 49 ވަނަ މާއްދާއާއި ބަންދާބެހޭ ޤަވާޢިދުގެ 7 ވަނަ މާއްދާގެ (ހ) އާއި، ޤާނޫނުއަސާސީގެ 143 (ރ) ގައިވާ ސާބިޤާއަށް ތަބާވުމުގެ އުޞޫލާ ޚިލާފު އަމުރެއްކަމަށް ޕްރޮސިކިއުޓަރ ޖެނެރަލްގެ އޮފީހުން ބުނެއެވެ.

ޓެރަރިޒަމްގެ ޢަމަލެއް ހިމެނޭ (އައި.އީ.ޑީ ހަދައި ގޮއްވާލަން ރޭވުމުގެ) ތުހުމަތުގައިވާ ފަރާތެއް މުޖުތަމަޢުގެ ސަލާމަތަށްޓަކައި ގޭބަންދުގައި ބަހައްޓަން ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީއާއި ބަންދާބެހޭ ޤަވާޢިދާއި ސުޕްރީމް ކޯޓުގެ ސާބިޤާއާ އެއްގޮތް އަމުރެއްތޯ؛ އަދި ދަޢުވާ ހުށަހެޅުމަށްފަހު ބަންދާމެދު ގޮތެއް ނިންމަންވީ ކޮން ކޯޓަކުންތޯ.

ގޭބަންދުގެ ނިންމުން ބާޠިލު؛ ބަންދާމެދު ގޮތެއް ނިންމުމަށް ދަޢުވާ ހުށަހެޅިފައިވާ ކޯޓަށް ހުށަހެޅުމަށް އެންގި

ތުހުމަތަކީ ޓެރަރިޒަމްގެ ޢަމަލެއް ހިމެނޭ، ޤައުމީ ސަލާމަތަށް ނުރައްކާވާފަދަ މައްސަލައެއް ކަމަށްވާތީ ބަންދުގައި ބަހައްޓަންޖެހޭނީ ހޯމް މިނިސްޓްރީން ކަނޑައަޅާ ތަނެއްގައެވެ. ނަމަވެސް ދަޢުވާ ހުށަހަޅާފައިވާތީ ބަންދާމެދު ގޮތެއް ނިންމަންވީ ދަޢުވާ ހުށަހެޅިފައިވާ ކޯޓުގެ ޝަރީޢަތް ހިންގާ ފަނޑިޔާރެވެ.